Түркиянын коопсуздук күчтөрү дем алыш күндөрү Күрттөрдүн жумушчу партиясынын согушкерлери деп шектелген 32 кишини тындым кылышты. Тыюу салынган топтун ондогон согушкери чыгыштагы Ван чөлкөмүндө, дагы бир нечеси Ирак менен чек ара аймагында жок кылынды. Расмий адамдардын айтымында, күрттөр басымдуулук кылган Диярбакыр шаарында 10-январда армиянын бир жоокери жана бир полициячы окко учту. Түрк куралдуу күчтөрү өткөн декабрдын орто ченинде баштаган операцияда бардыгы болуп Күрт жумушчу партиясынын 448 согушкери өлтүрүлдү. Партия этникалык күрттөрдүн автономиясын жана укуктарын кеңейтүү үчүн күрөшүп келатат.