Кыргыз-тажик чек арасында кызмат өтөп жатып төрт ай мурун дайынсыз жоголгон жоокер боюнча сот отуруму 23-декабрда башталат. Ишти Ош гарнизонунун аскер соту карайт. Бул тууралуу “Азаттыкка” Мамлекеттик чек ара кызматынан кабарлашты.
Чоң-Алайдагы “Карамык” чек ара бекетинде кызматта жүргөн аскер Бексултан Баардинов 23-августта жоголгон. Чек арачылар алгач анын нөөмөткө кеткен бойдон дайынсыз экенин маалымдашкан.
Ош аскер прокуратурасы 14-сентябрда жоокер чек ара кайтарууга эмес, аңчылыкка кетип, изи табылбай калганын аныктап, кылмыш ишин козгогон. Аталган аскер бөлүктүн бардык башчылары кызматтан алынган. (SE)