Баш кеңсеси Лондондо жайгашкан Эл аралык мунапыс уюму Өзбекстанда 16 жылдан бери камакта жаткан журналист Мухаммед Бекжанды эркиндикке чыгаруу талабы менен ири өнөктүк баштады. Уюм тараткан билдирүүгө ылайык, акция 4-декабрдан 17-декабрга чейин бир катар мамлекеттерде уюштурулат.
61 жаштагы Мухаммед Бекжан өзбек оппозициясынын жетекчиси Мухаммед Салихтин иниси. Камалганга чейин “Эрк” гезитинин редактору болгон.
Бекжанды Ташкентте 1999-жылкы жардырууларды уюштурду деп Киевден кармап Өзбекстанга алып кетишкен. Сот аны 15 жылга эркинен ажыраткан. Үч жыл мурун абакта бейбаштык кылды деп дагы 4 жыл 8 айга камак мөөнөтү узартылган. (SE)