"Жихади Жон" деген ат менен белгилүү британиялык согушкер Мохамед Эмвазинин шериктеринин бири делген адам Түркияда, Стамбул шаарында кармалды. Учурда анын тек-жайын аныктоо аракеттери жүрүүдө.
Маалыматтарга караганда, Лондондун тургуну Айни Лесли Дэвис аттуу жаран мурда мыйзамсыз курал алып жүргөнү үчүн соттолгон жана 2013-жылы Сирияга согушууга кеткен, - деп жазат Би-Би-Си.
АКШ баштаган коалициянын маалымат катчысы полковник Стив Уоррен британиялык согушкер Мохамед Эмвазинин Сириянын Ракка шаарында аба соккусунан набыт кетиши бышыкталып жатканын билдирген. Бирок британ премьер-министри Девид Кэмерон анын өлгөн же өлбөгөнү азырынча белгисиз деп айткан.
“Ислам мамлекети” радикал тобу буга чейин "Жихади Жондун" барымтадагы Батыш жарандарын мууздап жаткан видеосун жарыялаган болчу. (КЕ)