Батыш Иорданда палестиналыктар жөөттөрдүн саганасын өрттөп жиберишти. Израил аскерлеринин билдиришинче, 100 чамалуу палестин Наблус шаарында Жусуп пайгамбардыкы делген күмбөздү өрттөп салышкан.
Исламчыл Хамас тобу 16-октябрды “Кек алуу күнү” деп жарыялаган. Батыш Иорданда эки жумадан бери жүрүп жаткан чатакташууда 32 палестиналык араб жана 7 жөөт өлгөн.
Бул коогалаң бүгүн БУУнун Коопсуздук кеңешинин кезексиз жыйынында каралат. Жаңжал жөөттөр Иерусалимдеги мусулмандар ыйык эсептеген ал-Аска мечитине ээ чыкканы жатыптыр деген каңшаардан улам башталган.
Мечит турган жайды жөөттөр Храм тоосу деп атап, ыйык тутушат.