Египетте “Ислам мамлекети” террордук уюму менен байланышы бар топтун мүчөлөрү эгер бийлик алдыдагы эки сутка ичинде камакка алынган мусулман аялдарды бошотпосо, алар барымтага алган Хорватиянын жаранын өлтүрөрүн айтып коркутууда. 5-август күнү “Синай жарым аралынын тобу” тарабынан жарыяланган тасмада кызгылт кийимде тизелеп отурган киши аты-жөнүн Томислав Салопек деп атаган. Анын жанында бычак кармаган, бети-башы чүмкөлгөн согушкер турат.
Жоочулардын колундагы хорватиялык жаран француздардын CGG деп аталган энергетикалык компаниясынын кызматкери. Аны 22-июлда барымтага алышкан.
Салопек Египетте исламчыл согушкерлер тарабынан уурдалган алгачкы чет элдик жаран. Аны уурдаган топ мурда “Ансар бейт ал-Макдис” деп аталган. 2014-жылдын ноябрында анын мүчөлөрү “Ислам мамлекети” уюмуна кошулууга ант берип, топтун атын өзгөртүшкөн.
Согушкерлер буга чейин АКШнын, Британиянын жана Жапониянын жарандарын барымтага алып, мууздап салган. (SE)