Президент Алмазбек Атамбаев бүгүн Сузакта жаңы курулган көпүрөнүн ачылыш салтанатына катышты. Ал чогулган эл алдында сүйлөп жатып көпүрө улут аралык ынтымакка, аймактардын биримдигине гана себепкер болушун каалады.
- Бир саясатчы "Мен парламентке мандат алыш үчүн керек болсо шайтан менен биригем" дептир. Ошондойлор элди бузганга, бөлгөнгө, бирин бирине тукурганга аракет кылат. Жер-жерге, региондорго бөлөм дегендер келет. Алардын баарын башка бир жакка айдаш керек, - деди мамлекет башчы.
Көк-Арт дарыясынын Сузак участогунда курулган көпүрө Жапон мамлекети бекер берген 12 млн доллардын эсебинен JICA агенттиги аркылуу курулду.
Эски көпүрө 1967-жылы салынган болчу. Анын ордуна жаңысын куруу иштери 2013-жылдын декабрь айында башталган. Узундугу 89, туурасы 13 метр.
Быйыл күзүндө Кыргызстанда парламенттик шайлоо өтөт. Үгүт кампаниясы расмий баштала элек болгону менен партиялар элди кыдырып, добуш топтоо аракетин көрүүдө. (RsK)