Украинанын чыгышында ок атышпоо режими бузулуп, өкмөттүк күчтөр менен Орусия колдогон жикчилдер арасында атышуулар арбыды. Бул жөнүндө ЕККУнун атайын байкоочулар миссиясынын өкүлү Майкл Боцюркив 15-апрелде Киевде Би-би-Сиге берген интервьюда айтты:
- Биз акыркы баяндамабызда, ачыгын айтсам, элдешүү бузулуп, атышуулар кескин көбөйдү деп жазуудабыз. Донецк аэропортунун ичинде, айланасында жана Широкино кыштагында айыгышкан уруш жүрүүдө. 14-апрелде гана алты саат ичинде Донецк аэропортунда жана атрабында 700дөн ашык жардырууну байкоочуларыбыз укту.
Боцюркивдин айтымында, стратегиялык жактан маанилүү Мариуполь порт-шаарынын четинде да салгылашуулар болууда.