Сарман Курманалиев Экинчи дүйнөлүк согушка, андан ары япон согушуна катышкан. 1940-жылы 20 жашында аскерге чакырылган Курманалиев алты жыл дегенде Ата Журтуна кайтып келген. Ал тууралуу маалыматтарды жана сүрөттөрдү "Азаттыктын" "Биздин тарых" долборуна неберелери алып келип берди.
Япон согушуна катышкан Сарман Курманалиев
Сарман Курманалиев (оңдо) 1920-жылы 15-апрелде азыркы Сокулук районуна караштуу Жыламыш айылында туулган. Ал 1937-жылы Кызыл-Туу айылындагы толук эмес мектепти аяктаган. Ошол эле жылы Фрунзе шаарындагы Педагогикалык техникумга тапшырып, аны ийгиликтүү бүтүргөн.
Курманалиев 1940-жылы 20 жашында аскерге чакырылганга чейин колхоздо иштеген. Аскердик милдетин алгач Ыраакы Чыгышта өтөп, ал жерде 1941-жылдын июнь айына чейин болот. 1941-жылы 22-июнда согуш башталганда кан майданга аттанган Сарман Курманалиев 50-артиллериялык полктун катарында кызмат кылган.
1945-жылы 9-майда Ата Мекендик согуш аяктайт. Бирок ошол эле жылы 9-августта япон согушу башталып, Курманалиев ал согушка жиберилген. Япон согушунда Мудассан, Хардин, Дайрен, Порт Артур жана башка шаарларды бошотууга катышып, 1946-жылы декабрда, алты жыл дегенде үйүнө кайтып келген.
Сарман Курманалиев 1947-жылы үйлөнгөн. Сүрөттө жубайы Зуура Кадыркулова экөө баш кошкон учур. Ал учётчик, дүкөнчү, гидротехник болуп иштеп жүрүп, пенсияга чыккан. Бир катар орден-медалдар менен сыйланган Сарман ата 2005-жылы 85 жаш курагында каза болгон. Жубайы Зуура Кадыркулова өмүр бою мектепте мугалим, директор болуп иштеп, пенсияга чыккан. Алар тогуз баланы тарбиялап чоңойткон. (Сарман Курманалиевдин сүрөттөрү жеке үй-бүлөлүк архивден алынды)