Бүгүн Бишкек шаарында ооган согушунун курмандыктарын эскерилди. Ал борбор калаадагы “Ата-Түрк” паркындагы ооган согушунун ардагерлеринин урматына орнотулган эстеликтин жанында болду. Митинг-реквием Бишкек мэриясы тарабынан уюштурулган.
Ооган согушунун курмандыктары эскерилди
Бүгүн, 15-февралда Ооганстандан советтик аскерлердин чыгарылганына 26 жыл толду.
Президент Алмазбек Атамбаев кечээ, 14-февралда Ооганстандан совет аскерлеринин чыгарылганына 26 жыл толуп жатканына байланыштуу кыргызстандык ардагерлерге куттуктоо жолдоду. Анда “ооганчылардын” Кыргызстанда туруктуулуктун сакталышына кошуп жаткан салымы баса белгиленет.
- Өткөн жылдарда кыргыз эли көптөгөн сыноолорду баштан өткөрдү. Терроризм, сепаратизм жана үй-бүлөлүк башкаруу канчалык коркунучтуу экенин көрдүк. Мекенибиздин башына мүшкүл иш түшкөн жооптуу учурларда ооганчы-жоокерлер биринчи болуп жардамга келип жатышты,- деп жазылат куттуктоодо.
Ооганстан согушунун курмандыктары Бишкек шаарындагы мечит, чиркөөлөрдө да эскерилди. Ооганстандагы согушка катышып келген жарандар согушта набыт кеткендерге багыштап куран окуп, дуба кылып, сыйынышты.
Куралдуу күчтөрдүн Башкы штабынын жетекчиси Асанбек Алымкожоев (оңдо).
Кожобек Рысбаев - ооган согушунун ардагери , Жогорку Кеңештин депутаты. Ал Ооган согушунун ардагерлеринин Бишкек шаардык кеңешин жетектейт
Кожобек Рыспаев жана ооганчы, генерал-полковник Абдыгул Чотбаев
Ооган согушуна интернационалдык кызмат өтөөгө 7 141 кыргызстандык жоокер жөнөтүлгөн. Анын 249у курман болуп, 504ү жараат алган. Маалыматтарга ылайык, төртөөнүн али күнчө дайыны жок. Эскерүү иш-чаралары Кыргызстандын бүт аймактарында өтүп жатат.