Бишкек шаардык соту Жогорку Кеңеш депутаты Нариман Түлеев боюнча Ленин райондук сотунун чечимин күчүндө калтырды. Былтыр райондук сот Бишкектин экс-мэри Түлеевди үй-мүлкүн мамлекет пайдасына чегерүү менен күчөтүлгөн режимге 11 жылга эркинен ажыраткан. Бирок депутат ага макул болбой, шаардык сотко арызданган.
Жогорку Кеңештин “Ата-Журт” фракциясынын депутаты Нариман Түлеев 2012-жылы августта мэр болуп иштеген кезде Кытайдан автобустарды жана таштанды тазалоочу техникаларды сатып келүүдө мамлекеттик бюджетке зыян келтирген деген айып тагылган. Түлеев менен кошо айыпталган мэриянын беш кызматкери 5-10-13 жылга чейин эркинен ажыратылган эле. Шаардык сот аталган кызматкерлерге чечимди өзгөртүүсүз калтырды.
Нариман Түлеев соттун мындай өкүмүн “саясий чечим" деп баалап келет. Ал 2012-жылдын июнь айынан бери УКМКнын тергөө абагында камакта.(BkA)