Өлкө парламенти бүгүн жактырган мыйзамга ылайык, мамлекет бир жыл ичинде эки ирет эскертүү алган интернет сайтты жаап койо алат.
Мыйзам 2015-жылдын 1-январынан тарта күчүнө кирмекчи.
Беларустун маалымат министри Лилия Ананичтин айтымында, мыйзам онлайн медианын каттоодон өтүүсүн талап кылбайт. Бирок министрлик интернет сайттар колдонгон материалдардын беларус мыйзамына шайкеш келер-келбесин көзөмөлдөп турмакчы.
Сайттардын мазмууну үчүн анын ээлери жоопкер болот.
Беларустун жаңы мыйзамы ошондой эле жаңылыктар сайттарына чет өлкөлүктөрдүн ээлик кылуу үлүшүн азыркы 30%дан 20%га түшүрдү.
Президент Лукашенконун оппонеттери жана батыш өлкөлөрүнүн бийликтери беларус лидерин бийликтеги 20 жылында басма сөз эркиндигин такай кысмактаганы үчүн сындап келишет.
Талдоочулар беларус бийликтеринин соңку кадамын салттуу медиа, теле-радио катуу көзөмөлдөнгөндүктөн, сынчыл пикир көбүнесе интернет сайттарда айтылып калганы менен түшүндүрүшүүдө.