Украин президенти Петро Порошенко 26-октябрда болуп өткөн парламенттик шайлоодо батышчыл көз караштагы партияларды колдогону үчүн шайлоочуларга ыраазылык билдирди. Кечээ кечке жуук Улуттук телеканал аркылуу жасаган билдирүүсүндө Порошенко коалиция түзүү тууралуу сүйлөшүүлөр 27-октябрда эле башталарын айтты. Ал билдирүүсүндө өкмөт башчы Арсений Яценюктун “Элдик фронт” партиясы “Порошенко блогунун” негизги өнөктөшү болорун билдирди. Президент ошондой эле парламентте Башмыйзамды түп тамырынан өзгөртүүчү көпчүлүккө ээ болууга үмүттөнүп жатканын кошумчалады.
