<p>Жергиликтүү ындыкара өспүрүмдүн өлүмүнө байланыштуу АКШнын борбордук бөлүгүндөгү Миссури штатынын Фергюсон шаарчасында нааразылык акциялары төрт күндөн бери өтүп жатат.</p> <p>Бул шаарчанын калкынын үчтөн эки бөлүгүн афро-америкалыктар түзөт.</p> <p>Кыжырланган демонстранттарды таратуу үчүн кечээ полиция көздөн жаш агызуучу газ колдонду. Нааразылык акциялары башталгандан бери 40тай киши камакка алынды.</p> <p>Полициянын ырастоосунда, 18 жаштагы Майкл Браунга ал унаада полицейлер менен кармашып жатканда ок тийген.</p> <p>Бирок күбөлөр куралсыз жигит полициядан качканда ага бир нече ирет ок атылганын айтууда.</p> <p>Бийликтер ок чыгарган полицейди иштен четтеткен, бирок коопсуздук жүйөсүнөн улам анын ысымын ачыктоодон баш тартууда.</p> <p>Президент Обама Фергюсондун калкын тынчтанууга чакырды. (UE) </p>
АКШда ындыкара жигиттин өлүмүнө байланыштуу нааразылык чыкты
Полициянын атайын бөлүгү Фергюсондун көчөлөрүндө. 13-август, 2014-жыл.