Апрель окуялары сүрөтчүлөрдүн көзү менен

Г.Айтиев атындагы Улуттук музейде республикалык күзгү сүрөт көргөзмөсүндө живопись, графика, скульптура боюнча эки жүзгө чукул эмгектер коюлду.

Дубалдарга илинген сүрөттөр ар кыл темада, кыргыздын кооз жаратылышы, жер бермети Ысык-Көлдүн көрүнүшү, философиялык ой-толгоолор чагылдырылган.

Көргөзмөгө коюлган эмгектердин башталышында сүрөтчү Орозган Мамбеталиеванын “Жайлоо”, “Чардактар” сыяктуу чыгармалары орун алган.

Сүрөтчү Бактыбек уулу Рысбек менен А.Сыдыковдун 7-апрель окуясы тууралуу эмгектеринде Ак үйдүн жанында кымгуут түшкөн калың элдин, окко учкан балдардын канга боелгон элестери камтылган.

Колуна комузун алып, жашап өткөн өмүрүн күүгө салып, ойлуу отурган токсон жаштагы аксакал тууралуу тартылган “Улуу ата мекендик согуштун катышуучусу” деген чыгарманын автору, сүрөтчү Жусуп Матаев.