Ирандын конституциялык көзөмөл органы – Сакчылар кеңеши 12-июнь күнкү президенттик шайлоонун жыйынтыктарын жокко чыгаруу талабын четке какты. Мамлекеттин карамагындагы “Пресс ТВ” телеканалы кеңештин маалымат катчысы Аббас Али Кадходаиге шилтеме жасап кабарлаганына караганда, Сакчылар кеңеши шайлоодо “олуттуу бурмалоолор же мыйзам бузуулар болгон эмес” деген тыянакка келди. Президент Махмуд Ахмадинежаддын шайлоодогу негизги атаандашы Мир Хосейин Мусави шайлоо бурмалоолор менен коштолду деп, өнөктүктү жеңгенин ырастоодо.
