“Демократияны жана укукту өнүктүрүү” фондунун директору Абдыманап Халилов маалымдашынча, Ош шаардык соту быйылкы март айынан бери тергөө абагында кармалып турган укук коргоочу Равшан Гапировду Интернет аркылуу тараткан баракчаларында диний араздашууну ырбаткан деп айыптап, бир жылга күчөтүлгөн тартипке эркинен ажыратты. Бейөкмөт уюм башчысынын пикиринде, судья кылмыш ишин бир жактуу карап, бийликтин буюртмасын аткаргандай. Ал эми мамлекеттик айыптоочу Нематжан Гудуков Гапировдун күнөөсү толук далилденгендигин, өкүмгө канааттанып тургандыгын белгиледи. (ATo)
