Барскоон кырсыгынан жапа чеккен айылдарынын тургундары өткөн жума күндөн бери Кумтөр алтын кенине кеткен жолду тосуп турушат. Жол эки жерден, Тосор айылынын жана Барскоон капчыгайынын кире беришинен тосулууда. Акцияга 150дөн 300гө чейинки киши кезектешип катышып жатат. Бул жерге тигилген эки боз үй жана бир чатырда өткөн түнү 50 чакты адам түнөштү. Жергиликтүү «Карек» бейөкмөт уюмунун башчысы Эркингүл Иманкожоеванын «Азаттыкка» билдиргенине караганда кечээ жол тоскондорго Жетиөгүз районунун акими, райондук милиция башчысы келип, Кумтөрдө иштегендер үчүн азык-түлүктөрдү өткөрүп коюуну суранышты. Бирок ага эл көнгөн жок.(SM)
