АКШнын вице-президенти Дик Чейни кечээ күнү Астана шаарынан сүйлөп, дагы бир жолу Маскөөнү сынга алды. Анын алдында, 4-май күнү ал Вильнюс шаарында өткөн бийик жолугушуу учурунда дагы Орусияны сындаган: "Орусияны биз эч кандай шартта душман деп эсептебейбиз, бирок Маскөө акыркы мезгилде айрым мамлекеттердеги демократиянын өнүгүшүнө кандайдыр бир ченемде каршы чыгып жатканы тууралуу өз тынчсыздануубузду билдиребиз, - деди Чейни Астанада. Орус маалымат каражаттары Чейнинин сөзүн - жаңы кансыз согуш баштоо деп баалады. Чейни казак президенти Нурсултан Назарбаев менен жолугуп, кызматташуу маселелерин талкуулады, бүгүн ал казак оппозициясынын өкүлдөрү менен жолугат.
