“Күнөстүү Өзбекстан” партиясынын мүчөсү Нодира Хидоятованын иши Ташкендеги сотто каралууда, оппозициячыл коалициянын төрагасы Санжар Умаровдун соту 3-февралга жылдырылды. Ташкендик укук коргоочу Сурат Икрамов сотторго катышууга мүмкүн болбой жатканын айтат. “Биз бүгүн эртең мененки саат 8де Күй-чирчик райондук сотуна барып, кире албай койдук. Ал жерде Мутабар Тожибаеванын иши каралмак, полиция жол тосуп өткөрбөй койду”, - дейт Икрамов. Укук коргоочулар булар саясий куугунтуктун курмандыгы деп эсептешет. Өзбекстандын башкы прокуратурасы Хидоятова менен Умаров экономикалык кылмыштар үчүн соттолуп жатканын кайталоодо.
