БИШКЕК. 17-июнда Бишкекте улуттук экономикалык форум болду. Анда Кыргызстандын мындан аркы экономикалык өнүгүү багыттары жазылган жаңы экономикалык программа талкууланды. Программа менен биринчи вице-премьер-министрдин милдетин аткаруучу Феликс Кулов тааныштырып, китепче болуп чыгарылган программа форумдун катышуучуларына таркатылды. Программада конституциялык реформа жүргүзүү, президент менен өкмөттүн кадр саясатын жакшыртуу, көз карандысыз сот системасын түзүү жана социалдык-экономикалык реформа жүргүзүүнүн багыттары камтылган. Феликс Куловдун билдирүүсү боюнча, программада коррупция менен күрөшүү багыттары да каралып, эң ириде мамлекеттик кызматкерлердин ичинде тартипти бекемдеп, алардын ишине жарандардын көзөмөлүн күчөтүү керектиги белгиленген.
