БИШКЕК. 23-майда өкмөт үйүнүн алдында бир нече нааразылык чаралары уюштурулду. Алардын катарында 16-майдагы жер алуучуларга байланыштуу талаш-тартышта кармалгандарды бошотуу талабын койгондор, Бишкек шаарынын башкы архитекторун кызматтан кетирүүнү талап кылгандар, темир жол башкармалыгынын башчысы Нариман Түлеевдин кызматтан алынышына нааразы болгондор бар. Булардан тышкары жоон топ орус тилдүүлөр паспорт маселесине, социалдык жардамдарга нааразылыктарын айтып чыгышты. Алар менен саламаттык сактоо министри Миталип Мамытов жолугушуп, медициналык камсыздоо маселесине көмөктөшүүнү убада кылды.
