БИШКЕК. Талас облусундагы Карабуура райондук милициясынын башчысы подполковник Акылбек Алдашев №56 Карабуура шайлоо округу боюнча Жогорку Кеңештин депутаттыгына талапкер Кубанычбек Турмамбетовдун тарапкерлери Кенже Асанкулова жана Айна Кабылбекованы кармап, алардын колундагы үгүт материалдарын тытып салган. Милиция башчысы Турманбетовдун пайдасына үгүт иштерин жүргүзбөөнү аты аталган адамдардан талап кылган. Бул тууралуу «Арнамыс» партиясынын саясий кеңешинин мүчөсү Абдысапар Баялинов 3-февралда билдирди. Анын айтымында, бул окуя боюнча арыз жергиликтүү прокуратурага жолдонууда.
