Кечээ күнү ирактык күрддөр өкүлчүлүгү Нью-Йорк шаарында Бириккен Улуттар Уюмуна арыз тапшырды. Ага ылайык, азыр Ирактын курамына кирген Күрдистандын эгемендүүлүгү жөнүндө элдик референдум өткөрүү зарыл. Маселе боюнча атайын кыймыл уюштурулуп, референдум үчүн ал бир миллион 700 миң адамдын колун топтогон. Күрддөр негизинен Ирак, Иран жана Түркияда жашайт жана үч өлкөнүн тең өкмөтү алардын эгемендүү мамлекет түзгөнүнө каршы. 30-январда Иракта парламенттик шайлоо өткөрүлөт, ага күрддөр да катышууга тийиш жана аны менен кошо күрддөрдүн автономиялык парламенти дагы шайланат.
