Израилдин жер бийлигинин өкүлүнө ылайык, бул агенттик Батыш жээкте кеминде 300 жаңы үй курууга көрсөтмө берди. Бул чечимди айрымдар Газа тилкесинен Израилдин баардык аскерлери чыгарылгандан кийин премьер-министр Ариэл Шарондун Батыш жээктеги жөөт айылдарын бекемдөө максаты менен түшүндүрүп жатышат. Кошмо Штаттары бул планга шарттуу колдоо билдирген. Палестиналык өкмөт башчысы Ахмед Куреи Вашингтондун мындай туруму тынчтык жараянын таш-талкан кылаарын билдирди.
