БИШКЕК. Бүгүн Жогорку Кеңештин Мыйзам чыгаруу жыйынынын имаратында «Баткен-2003» аттуу сүрөт көргөзмөсү ачылды. Көргөзмө өлкөнүн түштүгүндөгү чек арага Өзбекстан тарабынан көмүлгөн миналардан курман болгон жана жабыркаган кыргызстандыктардын көйгөйүнө арналды. Мындай иш-чара Кызыл чырым коомунун жергиликтүү бөлүмүнүн жана Мыйзам чыгаруу жыйынынын депутаты Ташболот Балтабаевдин демилгеси менен уюштурулду. Өзбекстан тарап көмгөн миналардан 2001-жылдан бери Баткен облусунда беш киши каза болуп, дагы бешөө ар кандай жараат алышкан. Өзбекстан 1999-2000-жылдары «Өзбекстан ислам кыймылынын» согушкерлеринен коргонуу максатында Кыргызстан менен макулдашпастан чектеш аймактарга мина көмгөн. Андан бери Өзбекстан тарап миналардын кайсы жерге көмүлгөндүгү тууралуу Кыргызстанга маалымат бербей келет.
