ЖАЛАЛАБАД. Облустук прокуратурадан бүгүн алынган маалымат боюнча, 15-майда ички иштер кызматтарына бүлүк салгандардын ишин Жалалабад шаар соту 8-июлда териштирет. Жети томдон турган кылмыш иши менен айыбы угузулган 9 адам жана алардын коргоочулары, мамлекеттик айыптоочулар менен шаардык сот таанышып бүттү. 13 жабырлануучу менен бирге 91 кишиге чакыруу кагаздары жиберилди. Окуяга катышкандарга Кылмыш кодексинин 6 беренесине ылайык «куралдуу козголоң», «каракчылык», «курал-жарак тоноо» жана «ички иштер кызматкерлеринин өмүрүнө коркунуч келтирүү» деген күнөөлөр коюлган. Жети айыпталуучунун ата-энеси «балдарыбыз турмуштун оордугунан улам ушундай ишке барышты» деп эсептешип, балдарынын айыбын кечирүүнү өтүнүп, президент Аскар Акаевге жана Жогорку Кеңешке кайрылышкан.
