ЖАЛАЛАБАД. «Акаевди кызматтан кетирүү жана эл үчүн реформа жасоо» коомдук кыймылынын Жалалабад облустук комитети АКШнын Кыргызстандагы элчиси Жон О'Кифке атайын билдирүү менен кайрылды. Билдирүүдө өлкөдө адам укугу сакталбагандыгы белгиленип, «Кыргызстан - адам укугун урматтаган өлкө» деген ураан эл аралык коомчулуктун көзүн боегондук катары бааланган. Комитеттин 2002-жылдан ушул күнгө дейре митинг өткөрүү боюнча бир канча өтүнүчтөрүнө Жалалабад шаар бийлиги уруксат бербегендиги белгиленген. 4-сентябрда болгон тынч митингге жүздөгөн милиционерлер жиберилип, 5 киши мыйзамсыз жаза тартканы, казыналык кызматчылардын митинги тоскоолдуксуз өтөөрү айтылган. Кайрылуу ээлери абалды өз көзү менен көрүп, ишениши үчүн АКШнын элчиси Жон О'Кифти Аксы районунда 17-мартта боло турган аза күтүү митингине чакырышты.
