Фидел Кастро өлкөнү 50 жылдай башкарган.
“Куба революциясынын жол башчысы 25-ноябрда, 22:29да кайтыш болду” деп айтты Раул Кастро улуттук телеканалдан.
1953-жылы Кастро кубалык диктатор Фульхенсио Батистону тактан оодарууга катышып, бирок ал аракет ишке ашкан эмес. Натыйжада Кастро 15 жылга абакка кесилген. Бирок эки жылдан кийин мунапыска илинип, эркиндикке чыккан.
Фидел Кастро бийликке 1959-жылы, Эрнесто Че Гевара менен чогуу ишке ашырган партизандык согуштан кийин келген. Кастро өлкөнүн өкмөтүн, Раул Кубанын куралдуу күчтөрүн жетектеген.
Ага-ини Кубаны социалисттик өлкө деп жарыялап, Советтер союзу менен алака түзгөн.
1961-жылы АКШ Кастрону кетирүүгө аракет кылган. Бирок Кубага жиберилген десанттар Чочколор кысыгында жок кылынган. Америкалыктар буга жооп иретинде аралды экономикалык блокадага алган.
Фидел Кастронун өмүрү
1962-жылы “Кариб кризисинен” кийин Кубага дүйнөнүн көңүлү бурулган. Советтер союзу Кубага ядролук куралдарын жайгаштырса, АКШ аскер-деңиз блокадасын киргизген.
СССРдин кулашы менен Кубада оор экономикалык кырдаал жаралган. Он миңдеген жашоочулар өлкөнү таштап чыгып кеткен.
Батыш Кастронун режимин адам укугун бузганы үчүн бир нече жолу сынга алган. 2003-жылы 75 кубалык диссидент түрмөгө айдалган. Amnesty Internаtional уюмунун 2016-жылдагы бүтүмүнө таянсак, Кубада 50дөн ашык абийир туткуну абакта жатат. 8600 адам саясий негизде кармалган.
Фидел Кастро 2006-жылы ден соолугуна байланыштуу бийликти иниси Раулга өткөрүп берген. 2008-жылы президенттиктен, 2011-жылы Компартия жетекчилигинен баш тарткан.
Акыркы беш жылда Кастро мемуар жазуу менен алектенип, дүйнөдө болгон окуялар тууралуу сүйлөп келген.
