АКШда жаңы шайланган президент Дональд Трамп Украина менен Орусиянын ортосунда "буфердик аймак" түзүүнү сунушташы ыктымал. Бул тууралуу The Telegraph басылмасы Трамптын айланасындагы булактарга шилтеме кылып жазды.
Ал планда фронттун азыркы тилкеси сактоо, Киевдин НАТОго алдыңкы 20 жылда кошулбоо тууралуу макулдугун алуу каралган. Вашингтон анын ордуна Украинага ири өлчөмдө курал-жарак берет жана Орусиянын мындан ары согуш баштоосуна жол бербейт. АКШ буфердик аймакты күзөтүүгө аскер жөнөтпөйт жана бул долбоорду каржылабайт.
Киев менен Москва бул план тууралуу азырынча комментарий бере элек.
Буга чейин Трамп эгер дагы президент болуп шайланып калса, Украина менен Орусиянын согушун 24 сааттын ичинде токтотуп кое аларын бир канча жолу билдирген.
Украинанын президенти Владимир Зеленский менен Орусиянын президенти Владимир Путин Трампты жеңиши менен телефондон куттуктаган.
Кремлдин басма сөз катчысы Дмитрий Песков АКШдагы ант берүү аземине чейин Путиндин Трамп менен сүйлөшүүсү ыктымалдыгын четке каккан эмес.
Орусия күчтөрү 9-ноябрга караган түнү Украинанын Одесса жана Харьков шаарына сокку урду. Бул тууралуу украин бийлиги кабарлады.
"Душман Одессага жана анын райондоруна дрондор менен чабуул жасоодо. Абадан коргонуу күчтөрү иштеп жатат”, - деп жазды Одесса администрациясынын башчысы Олег Кипер.
Жергиликтүү бийликтин маалыматына караганда, чабуулардан бир нече көп кабаттуу үй жана жер тамдар, административдик имарат, кампа, автоунаалар талкаланды. Жарадар болгондор жөнүндө кабарланган жок.
Харьковдун мэри Игорь Терехов шаарга авиациялык бомба менен сокку урулганын билдирди. Снаряд шаардын эки району кесилишкен жердеги жолго түшкөн. Жабыркагандар тууралуу маалымат жок.
Орусиянын Коргоо министрлиги түндөгү чабуулдар жөнүндө маалымат тараткан жок.
Украина шаар-кыштактарында Орусиянын чабуулдары уланып жатканын 8-ноябрда бутага түштүктөгү Одесса жана түндүк-чыгыштагы экинчи ири шаар Харьков алынганын билдирди.
Жергиликтүү бийлик өкүлдөрүнүн маалыматына караганда, кеминде бир кишинин өмүрү кыйылды, дагы 38 киши, анын арасында бир ымыркай жараат алды.
Каза тапкан киши Одессанын тургуну болгону, бул шаарга учкучсуз учактардын жапырт чабуулу жасалганы, үйлөр, ишканалар, кампалар жана бир мектеп имараты талкаланганы маалымдалды.
Харьков кечээтен бери аткыланып жатканын шаар мэри Игорь Терехов жазды. Анын айтымында, ракеталардын бири көп кабаттуу турак үйгө тийди, жараат алган ондогон киши арасында үч айлык наристе да бар экени, шаардын борбордук бөлүгүндөгү тарыхый жай да кыйраганы белгилүү болду.
Киев облусунда ракетанын сыныктары түшкөн жерде төрт киши жараат алды.
Ал эми Запорожье шаарында 7-ноябрдагы чабуулдан каза тапкандар саны тогуз кишиге жетти, алардын арасында бир жашар наристе да бар, дагы 40ка жакын киши жараат алды. Өзгөчө кырдаалдар боюнча мамлекеттик кызмат бул күнү аталган шаарга Орусия беш жолу абадан сокку урганын, турак үй жана оорукана бутага алынганын кабарлады.
Запорожьеде жума күнү Аза күтүү жарыяланды.
Бул күндөрү Венгрияда Европа Биримдигинин лидерлеринин саммитине катышып жаткан украин президенти Владимир Зеленский союздаштарынан колдоо күтөрүн кайрадан кайталап, көбүрөөк курал-жарак жана асманын коргоп берүүгө жардам сурады.
Украинада орус армиясынын генерал-майору каза болду
Украинада орус армиясынын генерал-майору каза болгонун 7-ноябрда "Свобода" радиосу жазды. Павел Клименко мотоаткычтар бригадаларынын биринин командири болчу. Ал тууралуу "түздөн-түз согуш талаасына эмес, тылда калууну өтүнгөн аскерлерден пара алган, кол астындагы аскер кызматкерлерин кыйнаган" деген сөздөр айтылчу.
47 жаштагы Клименконун өлүмүнүн себеби азырынча белгисиз, ал каза болгонун алгач аскер темасын чагылдырган блогерлер жазып чыгышты.
"Астранын" иликтөөлөрүнүн биринде Клименко Донецкиде кароосуз калган шахтада орусиялык аскерлер кыйноого алынуучу концлагерь ачканы, ошол жактан согушка чабуул коюучу топтун катарында катышууга мажбурлоо жүргөнү, кээ бирлеринен пара талап кылынганы айтылган.
Айрым блогерлер анын бригадасы өтө көп жоготууга учурап жатканын да жазышкан. Клименконун кол астындагылар пара берип, тылга которулуп кете алары көп айтылган.
Ушуну менен Украинадагы согушта Орусия жоготкондугу аныкталган, өлүмү журналисттердин жана көз каранды эмес иликтөөлөдүн негизинде тастыкталган генералдарынын саны сегизге жетти.