27-августка караган түнү Орусиянын армиясы Украинанын аймактарына абадан жапырт чабуул коюуну улантты. Соккулардын бири Днепропетров облусуна караштуу Кривой Рог шаарындагы мейманканага тийип, кеминде төрт адамдын өмүрүн алганы кабарланды. Дагы бир нече кишинин дайыны табылбай жатат.
Облус губернатору Сергей Лысак Телеграм-каналы аркылуу билдиргендей, чабуулдун жыйынтыгында төрт көп кабатуу имарат жана дүкөн жабыркады.
Андан тышкары Запорожье облусунда эки адамдын өмүрү кыйылганын жергиликтүү бийлик билдирди.
Баш калаа Киевге чабуул койгон 15 дрондун баарын абадан коргонуу системасы жок кылганын шаар администрациясы маалымдады. Учкучсуз аппараттын калдыктары түшкөн токой чарбада өрт тутанганы белгилүү болду.
Украинанын Аба күчтөрү 27-августтун таңында жалпысынан 60тай дрон жана беш ракета атып түшүрүлгөнүн кабарлады.
26-августта дагы орус армиясы Украинанын аймагына 200дөн көп дрон жана ракета менен жапырт чабуул койгон. Жыйынтыгында жети киши набыт болуп, энергетикалык инфратүзүмдөр жабыркаган.
Украинанын президенти Владимир Зеленский союздаштарды "батыл чечимге" барып, Киевге Батыштын куралы менен Орусиянын аймактарындагы аскердик турумдарга сокку урууга уруксат берүүгө чакырды.
АКШ президенти Жо Байден 26-августта Украинага жасалган жапырт чабуулду "акылга сыйгыс" деп сынга алды.
Орусиянын Коргоо министрлиги дүйшөмбүдө Украинанын энергетикалык обьектилерине жапырт сокку урганын моюнга алган.
Чабуулдар украин армиясы Орусиянын Курск облусунда ондогон айыл-кыштактарды өз карамагына алып, аскердик операциясын улантып жаткан маалда болууда.
Орусиялык бир нече Telegram канал 26-августта Омск шаарында жайгашкан эң ири орусиялык мунай иштетүүчү заводдо катуу жарылуу болуп, өрт чыкканын кабарлашты. Канал 112 жана Baza кабарлагандай, "Газпромнефть-ОНПЗ" заводундагы жарылуудан кийин өрт каптаган аянт 1000 чарчы чакырымга жеткен.
Ишкананын жетекчилиги кырдаал көзөмөлдө экенин, заводдун иши үзгүлтүккө учурабаганын, "технологиялык жабдык күйгөнүн" билдирди.
Омск облусунун губернатору жети киши жараат алганын, кылмыш иши козголуп, тергөө башталганын, кырсыктын себептери иликтенип жатканын айтты.
"Газпромнефть-ОНПЗ" ишканасы жылына 22 миллион тонна мунайды иштетет.
Быйыл жыл башынан бери Орусиянын европалык бөлүгүндө бир топ мунай заводу украин учкучсуз учактарынын чабуулуна кабылып, айрымдары жарактан чыкты. Омск аймагынан Украинага чейинки аралык 2 миң чакырымды түзөт.
Бүгүнкү окуяга эмне себеп болгону азырынча так айтыла элек.
Украинанын аймагы 26-августтун таңында орус армиясынын жапырт аба соккусуна дуушар болду. Бутага негизинен энергетикалык обьектилер алынды. Ушул эле күнү Орусиянын Саратов жана Энгельс калаалары дрон чабуулуна туш болгону кабарланды.
"Жүздөн ашуун ракетанын ар кандай түрлөрү жана жүздөн ашуун "Шахед" дрондору. Буга чейинки Орусиянын соккуларынын көбүндөй эле, бул дагы абдан маанилүү жарандык инфраструктурага багытталган адамгерчиликсиз чабуул",- деп украин президенти Владимир Зеленский 26-августтун таңында өлкө аймагына жасалган жапырт аба чабуулду комментарийледи. Дүйшөмбү таңда борбор калаа Киев баштаган ондогон калаа жана облустарда сиреналардын үнү жаңырып, орус армиясынын ракета, дрон жана башкаруучу авиабомбаларынын чабуулуна туш болду.
Зеленский өнөктөштөрүн Украинанын "чечкиндүү чара" көрүүгө чакырды.
"Алсыздык жана жетишсиз чечимдер террордун күчөшүнө жол берет. Ар бир лидер, өнөктөштөрүбүздүн баары бул согуштун адилеттүү аякташы үчүн кандай чечкиндүү кадамдар керек экенин жакшы билет", - деп кошумчалады украин президенти.
Украин армиясы Орусиянын Курск облусуна кирип барып, күндөн-күнгө карамагына алган айыл-кыштактардын саны көбөйүп жаткан маалда, бул соңку жумалардагы эң ири аба чабуул болуп калды.
Аба соккулардан Житомир, Волын, Днепропетровск, Харьков, Запорожье аймактарында жалып беш киши набыт болгонун жергиликтүү бийлик билдирди.
Украинанын өкмөт башчысы Денис Шмыгаль жалпы 15 облусу жабыркаганын билдирди. Ал ошондой эле орус армиясы энергетикалык инфратүзүмдөрдү бутага алганын кошумчалады. Ракеталык соккудан кийин Украинада электр энергиясын берүү үзгүлтүккө учурады.
Киевде бир нече район жарыксыз калды. Андан тышкары Львов жана Николаев облустарында маселе жаралды.
Орусиянын Коргоо министрлиги Украинанын "аскердик өндүрүш комплексин камсыздаган энергетикалык жайларга жапырт сокку урганын" мойнуна алып, баардык "буталар жок кылынганын" билдирди.
"Биздин энергетиканы жок кылууну көздөгөнү үчүн орусиялыктар жогору кун төлөшөт, өзүлөрүнүн инфратүзүмдөрү менен",-деп жазды украин президентинин кеңсесинин башчысы Алексей Ермак.
Орусиянын Саратов шаарындагы эң бийик имарат жабыркады
26-августтун таңында Орусиянын Саратов жана Энгельс шаарларына дрон менен чабуул жасалды. Саратовдогу 37 кабат үйгө тийген дрондон бир аял мүрт кетип, бир нече адам жараат алганы кабарланды.
Ошондой эле Энгельс шаарындагы авиавбазага дрон тийгени маалым болду. Андан тышкары дагы бир дрон ушул эле калаадагы көп кабатуу үйдүн чатырына түшкөн. Анын калдыктарынан жыйырмадан ашуун автоунаа жабыркаганын орусиялык телеграм-каналдар жазышты.
Бул эки калаа Волга дарыясынын эки жээгинде бет маңдай жайгашкан. Энгельс калаасындагы авиабаза шаардан төрт чакырым алыстыкта жайгашкан. Саратовдун аэропорту чабуулдан кийин ишин убактылуу токтотту. Энгелстеги аскердик аэродром бир нече ирет дрондордун чабуулуна дуушар болуп келген. Ал жакта Украинадагы чабуул үчүн колдонулган Ту-95 жана Ту-22 бомбалоочу учактары жайгаштырылган.
Орусиянын Коргоо министрлиги жалпы жети облуста жыйырмадай дрон атып түшүрүлгөнүн кабарлады. Киев бул чабуулдар тууралуу үн каткан жок.
Рейтердин кызматкеринин өмүрүн алган сокку
25-августта орус армиясынын чабуулунан Украинадагы согушту чагылдырып жүргөн Reuters агенттигинин кызматкери Райан Эванс мүрт кетти. Журналисттерди коштоп жүргөн Эванс өзүнөн башка беш кесиптеши менен Донецк облусуна караштуу Краматорск шаарындагы "Сапфир" мейманканасына жайгашкан. Эки журналист жараат алып ооруканага жеткирилди. Биринин абалы оор.
Жабыркагандардын жакындарына көңүл айткан украин президенти Владимир Зеленский мейманканага "Искандер" ракетасы менен сокку урулганын белгиледи.
"Рейтерстин" кызматкерлеринен башка отелде жайгашкан Польша, АКШ жана Украинанын журналисттери жараат алганы белгилүү болду.
Мурдагы аскер, 38 жаштагы Эванс Рейтер агенттиги менен 2022-жылдан тартып кызматташып жүргөн. Ал журналисттерге коопсуздукту камсыздоодо кеңеш берчү.