Дрон чабуулунан кийин Волгограддын аэропортунда каттамдар токтотулду
Волгограддын аэропорту аймакта дрон чабуулуна байланыштуу киргизилген чектөөлөрдөн улам аба каттамдарын кабыл алууну жана жөнөтүүнү убактылуу токтотту.
Бул тууралуу РБК аэропорттун басма сөз кызматына шилтеме берип билдирди.
Буга чейин облус бийлиги дрондордун тункү чабуулунан кийин аскердик объектилердин биринде өр чыкканын кабарлаган.
Орусиялык Телеграм-каналдар дрондор Волгограддан 50 чакырым алыстыкта жайгашкан Октябрь айылындагы "Мариновка" аскердик аэродромун бутага алганын жана ал өрттөнүп жатканын жазышты.
Москванын мэри Сергей Собянин орус баш калаасына дрондор менен масштабдуу чабуул жасоо аракети болгонун билдирди. Ал 21-августка караган түнү шаарды көздөй учуп келаткан кеминде 10 дрон атып түшүрүлгөнүн кабарлады. Мэр жабыркагандар жана кыйроолор тууралуу маалымат түшпөгөнүн кошумчалады.
"Москвага багытталган дагы эки учкучсуз аппарат атып түшүрүлдү. Бардык чабуулдарды алдын алууга Москванын күчү жетет. Коргоо министрлигинин абадан коргонуу күчтөрү ошол түнү 10 дронду атып түшүргөн. Бул Москвага жасалган ири чабуулдардын бири болду. Биз кырдаалды көзөмөлдөп жатабыз", - деди мэр Собянин.
Орусиянын Коргоо министрлиги 21-августка караган түнү жалпы жонунан өлкөдө 45 дрон атып түшүрүлгөнүн билдирди.
Маалыматка караганда, Москва облусунун аймагында 11, Брянскиде 23, Белгород облусунун аймагында 6, Калуганын үстүнөн 3 жана Курск облусунун аймагында 2 дрон жок кылынган.
Украинанын куралдуу күчтөрүнүн башкы штабы шаршембиге оогон түнү аскерлери Ростов облусундагы Новошахтинск деген жерге жакын жайгашкан С-300 зениттик-ракеталык комплекске сокку урганын маалымдады.
Телеграм-каналдарда жарыяланган видеодо ракетанын сыныктары түшкөндө өрт тутанганы айтылууда. Бул маалыматты ыкчам текшерүү мүмкүн эмес.
Киевге бир нече саатта үч жолу чабуул болду
20-августта орус аскерлери Украинанын Запорожье облусунун Малокатериновка айылындагы "Лаванда" балдар кафесине чабуул койгондо бир өспүрүмдүн өмүрү кыйылды. Украин полициясы дагы тогуз өспүрүм жараат алганын кабарлаган.
"Мен ал балдардын баарын жакшы тааныйм. Алар биздин балдар. Ушул жерде эле менин балам сейилдейт. Ал күнү жок эле. Кудай сактады", - Сергей Волик деген полиция кызматкери.
Ал эми 21-августта Киевде бир нече сааттын ичинде үчүнчү аба чабуулу болгону кабарланды. Украин баш калаасында Орусиянын аба чабуулунан коргонуу үчүн эскертүү жарыяланды. Мындай эскертүү өлкөнүн башка аймактарында да жарыяланууда.
Ушуну менен август айынын башынан бери Киев бешинчи жолу орус аскерлеринин ракеталык чабуулуна кабылганы белгиленди.
Ушул тапта Курскиде кармаш уланууда. Украин армиясы шейшемби күнү Орусиянын Курск аймагындагы кармаш тууралуу видео жарыялады.
Бир күн мурун Орусиянын коргоо министри Андрей Белоусов Украина чабуулун улантып жаткандыктан, Орусия чек ара аймактарына үч аскер тобун жайгаштырганын билдирген.
"Башкы штабдын өкүлдөрү, Белгород, Курск, Брянск аскердик топторунун командирлери жарандарды жана аймактарды учкучсуз аппараттардын чабуулдарынан коргоо үчүн жооптуу", - деди Белоусов.
Украина Орусиянын Курск облусунун аймагына 6-августта кирип барган.
Орусия Курск жана Белгород облустарында федералдык деңгээлдеги өзгөчө кырдаал жарыялап, бир нече жараны каза тапканын, 200 миңдей жараны эвакуация болгонун кабарлаган. Ушул тапта Украина аймакта кеминде 92 калктуу пунктун ээлеп турат. Киев бул операциясын өзүн коргоо үчүн буфердик зона түзүү аракети деп атоодо.
Украина 2022-жылдын февраль айынан бери Орусиянын агрессиясына каршы күрөшүн улантып келүүдө. Орус бийлиги "атайын аскердик операция" жүргүзүп жатканын айтып келет.
Орусиянын Борбордук шайлоо комиссиясы (БШК) кармаш жүрүп жаткан Курск облусунун жети муниципалитетине депутаттарды шайлоону башка убакытка которду. Бирок шайлоонун жаңы датасы такталган жок.
Буга чейин “Верстка” басылмасы өз булактарына таянып, БШК шайлоону “аймактагы бүдөмүк абалдан улам” 2025-жылга которууну пландаганын жазган.
Ал эми облус губернаторун шайлоо өз мөөнөтүндө өткөрүлмөкчү. 20-августта аймактык шайлоо комиссиясы 28-августтан тартып эрте добуш берүүгө уруксат берген.
Жарышка катышып жаткан губернатордун милдетин аткаруучу Алексей Смирнов шайлоо "абдан татаал кырдаалда өтөрүн", добуш берүүчулөрдүн колдоосу "мурда болуп көрбөгөндөй керек болуп жатканын" жазды.
Украин армиясы Орусиянын чек арадагы Курск облусуна 6-августта кирген. Соңку маалымат боюнча, украиндер кеминде 92 калктуу пунктту ээлеп турат.
Региондо федералдык деңгээлдеги чукул кырдаал жарыяланган. Калк эвакуацияланып жатат. Расмий маалыматка караганда, чабуул маалында карапайым 31 киши каза тапты, 143ү жабыркады.
Киев бул операциясын өзүн коргоо үчүн буфердик зона түзүү аракети деп атоодо.
Шаршембиде эртең мененки аткылоодон Донецк облусунда бир аял каза тапты. Аймактын аскердик администрациясынын башчысы Вадим Филашкин орус армиясы Северскини артиллериядан бутага алганда дагы бир киши мерт кеткенин билдирди.
Администрация ошондой эле 20-августтагы чабуул маалында Торецкиде каза болгондордун саны дагы бир кишиге өскөнүн маалымдады.
«Азаттыктын» украин редакциясы жазгандай, ага чейин облус жетекчилиги Донбасста 24 саатта бир киши окко учканын, төртөө жабыркаганын билдирген.
Шейшембиде орус аскерлери Запорожье облусундагы Малокатериновка айылындагы балдар кафесине сокку урганын регионалдык администрациянын башчысы Иван Федоров маалымдаган.
Украинанын улуттук полициясы беш киши, арасында өспүрүмдөр жараат алганын, бирөө кийин ооруканада көз жумганын кабарлаган.
Башкы прокуратура согуштун мыйзамдарын бузуу фактысы боюнча сотко чейинки териштирүү башталганын билдирди.
"Орусиянын адамгерчиликтин чегинен чыккан дагы бир кылмышы. Кылмыштуу агрессия үчүн күнөөлүү адамдар сот жообуна тартылмайынча, биз токтобойбуз”, - деп айтты башкы прокурор Андрей Костин.
Фактыларга карабай, Орусия Украинага кол салгандан бери кошуна өлкөнүн карапайым тургундарын, балдарды, жарандык жайларды бутага алганын танып келет.