Бул тууралуу Голландиялык терроризмге каршы эл аралык борбордун баяндамасында айтылат. Андагы маалыматка караганда, террорист жанкечтилер көп чыккан өлкөлөрдүн сап башында Сауд Арабиясы жана Марокко турат.
“Ислам мамлекети” террордук тобундагы жанкечтилердин “рейтингин” аныктоодо Сирияда жана Иракта 2015-жылдын декабрынан 2016-жылдын ноябрына чейин жанкечтилер жасаган иштер, кылмыш фактылары иликтенген.
Тажикстандан 27, Сауд Арабиясынан 17, Мароккодон 17, Тунистен 14, Орусиядан 13, Египеттен 11, Палестинадан 9, Бириккен Араб Эмираттарынан жана Бельгияден барган 1 согушкер өзүн-өзү жардырганы айтылат.
Баяндаманын авторлору “Ислам мамлекети” террордук тобунун жанкечтилери көпчүлүк учурда, тактап айтканда, 70 пайызы эл көп топтолгон жерлерде автоунаанын ичинде өзүн жардырышканын белгилеген.
Буга чейин Дүйшөмбүдө өткөн маалымат жыйынында тажик ички иштер министри Рамазон Рахимод өткөн жылы 36 террордук аракетке бөгөт коюлганын билдирген эле. Министр Дүйшөмбү шаарында жана башка Тажикстандын аймактарында чабуул жасоого аракеттенген 50 адам кармалганын да айткан.
Бул өлкөдө өткөн жылы жалпы 34 уюшкан кылмыштуу топтун бети ачылып, алардын 169 мүчөсү колго түшкөн. Расмий маалыматтар боюнча, Тажикстандан Сирия жана Ирактагы согуш жүрүп жаткан аймактарга 1100 жаран кетсе, алардын 160тан ашыгы каза тапканы айтылат.
Тажик бийлиги 2016-жылы өткөн жылдарга салыштырмалуу экстремисттик жана террористтик топторго тартылгандардын саны азайганын билдирүүдө.
Ирак менен Сирияда дүрбөлөң салган "Ислам мамлекети" террордук уюму Борбор Азиядан согушкерлерди өз катарына тартууда. 2015-жылдагы расмий маалыматка ылайык, Кыргызстандан 500гө жакын, Казактан менен Өзбекстандан 2000ден ашуун жаран Сириядагы от күйгөн согушка аттанган. Кыргыз бийликтери 100го жакын жараны уруштарда өлгөнүн маалымдаган. Бирок коопсуздук боюнча эксперттер бейрасмий сан мындан жогору болушу ыктымалдыгын белгилешет. 2015-жылы Өзбекстанда Орусия менен Түркиядан кайткан ондогон мигранттар «Ислам мамлекети» террордук тобунда болгон деп айыпталып камалганы белгилүү.
