Кыргызстанда керектүү тамак-ашты тоё жебеген өспүрүмдөрдүн саны миңдеп саналат. Өсүп жетилип жаткан баланын организмине керектүү азык заттар менен балдар жетиштүү тамактанбаса, алардын ден соолугу келечекте чың болбой калышы мүмкүн деп адистер ар дайым тынчсыздануу менен коңгуроо кагып келишет.
Ушуну эске алган кыргыз өкмөтү кенже класстардын балдарын тамактандыруу үчүн ар бир балага күнүнө жети сом бөлөт. Балдардын курсагы гана тойбостон, толук жетилип өсүүсү жана көңүлдөрү куунак, ар нерсеге ынтызар болуп өсүшү үчүн зарыл азык заттарды санай келгенде жети сомдук тамактын жетишсиз экендиги айтпаса деле белгилүү.
Ошондуктан кыргыз өкмөтү БУУнун Дүйнөлүк азык-түлүк программасынын жетекчилигине көмөк сурап кайрылган. Өтүнүчтү камсыз кылуу боюнча 2013-жылдан баштап аталган программанын долбоору ишке киргизилген.
Андан тышкары Жапониянын Кыргызстандагы элчилиги каржылык жардам берип, Чүй жана Ысык-Көл облустарындагы 16 мектепке ашкана жабдуулары алынган. Ысык-Көл районунун Темировка айылындагы Кудайбердиева атындагы орто мектебинде да мына ошол чет өлкөлүк демөөрчүлөрдүн жардамы менен ысык тамак берилет. Бүгүн алар окуучулардын тамактануусунан кабар алганы келишти.
БУУнун Дүйнөлүк азык-түлүк программасынын жетекчисинин орун басары Кейко Изуши жеткинчектер өлкөнүн келечеги болгондуктан алардын саламаттыгына жаштайынан кам көрүлүшү керек экендигин баса белгилейт.
- Кыргызстандагы ар бир окуучу, жарды же бай үй-бүлөдөн болобу, айтор ысык тамак менен камсыздалышы керек. Бул биздин башкы максатыбыз. Карды ток бала сабагын жакшы окуйт. Билимдүү муун өлкөнү алга жетелейт. Окуучулар - мамлекеттин келечеги. Биз аларга кам көрүшүбүз керек.
"Бүгүнкү окуучу - өлкөнүн эртеңи" деп чет өлкөлүк демөөрчүлөр камкордугуна алып жатканы менен, окуучуларга өкмөт бөлгөн жети сомун эч нерсеге жеткире албаган мектеп жамааты өз алдынча кам көрүүгө киришкен. Буга мектептин чарба башчысы болуп 21 жылдан бери эмгектенип келаткан Кубат Дуулатов окуучулардын менюсуна өзү отургузган алма бактардын мөмөсүн киргизген.
Ал эми биология мугалими Талантбек Алиев эл аралык долбоорлорго кайрылып жана жетпеген каражатты айыл өкмөтүнөн бөлдүрүп алып күнөскана курган. Ал жерде бадыраң өстүрүп, балдардын тамагына кошот.
