Жанарбек Акаев: "Сындаганыңар туура эмес" деп айттыңыз. Мен билем, бул жерде ашып кетсе 10 депутат каршы чыгат. Башкалары колдоп берет, референдумду да колдоп беришет.
Талантбек Мамытов: Элибиз өз пикирин референдумда билгизет деп ойлойм.
Жанарбек Акаев: 2016-жылы Атамбаевдин Баш мыйзамын колдоп бергенбиз. Анда да "эл колдоп атат" дегенбиз. Азыркы президент шайлоого барса 2032-жылга чейин президент болобу же кандай?
Бактыбек Турусбеков: Беш, беш жылдан болот.
Жанарбек Акаев: Азыркы Баш мыйзам менен алты жыл болот. Эртең хандык башкаруу десе аны колдоп берсек, шахтык башкаруу десе аны колдоп берсек... Кичине намыска келип мөөнөт бүтөрдө мындан баш тарталы туугандар.
Бактыбек Турусбеков: Элдин талабы менен отурабыз. Өзүңөр басып барып сунуш бербей коркута бересиңерби?
Жогорку Кеңештин депутаты Жанарбек Акаев Конституциянын жаңы долбоорун жазган авторлордун аты-жөнүн ачыкка чыгарууну суранды. Ал 3-мартта парламенттин жалпы жыйынында спикерге ушундай өтүнүч менен кайрылды.
"Мыйзам долбоорун колубузга беришти. Ал жерде сексенден ашуун депутат "автор" деп жазылып турат, бирок алардын ким экени белгисиз. Компьютердеги версиясында да жок. Долбоорду талкуулаганга чейин авторлор тууралуу маалыматты бериңиздер. Алар ким экенин эл билиши керек", - деди Акаев.
Депутаттын сунушуна спикер "рахмат" деп жооп берди. Авторлор тууралуу маалымат берилеби-жокпу, айтылбай эле талкуу башталды. Долбоордун демилгечилеринин бири катары Бактыбек Турусбеков баяндама жасоодо.