Матраимовдордун «Карвендеги» коттеджи
Журналисттер ачык булактар аркылуу иликтөө ыкмаларын колдонуп, Матраимовдордун үй-бүлөсү Ысык-Көлдүн жээгиндеги байма-бай каттап турган коттеджди таап чыгышты.
Иликтөө кыргыз бажысынын жетекчисинин мурунку орун басары Райымбек Матраимовдун аялы Уулкан Тургунованын социалдык сайттардагы аккаунттарынан алынган маалыматка негизделген. Тургунова социалдык сайттарда «Аманда» деген ат менен катталган.
2015-2019-жылдар аралыгында Тургунова «Инстаграм» жана «Odnoklassniki» тармактарындагы баракчаларына өзүнүн жана балдарынын «Karven Four Seasons» эс алуу жайындагы сүрөттөрүнүн бир нече коллажын чыгарган.
Ал «Karven 4-Season» деген белги койгондуктан, сүрөттөр кайдан тартылганы белгилүү.
Алар бул жердин кумдуу жээгине эс алганы келишеби же Матраимовдордун үй-бүлөсү «Карвендеги» коттедждердин бирине ээлик кылабы?
Тургунова кээ бир сүрөттөрдө курбусу Чолпон Медерова менен турат. Эки аял бири-биринин сүрөттөрүн байма-бай чыгарып, алдына комментарийлерди жазышат.
2014-жылдын августунда жарыяланган сүрөттөрдүн биринде Медерова кош бойлуу курбусу менен эс алууда. «Сонун эс алуу үчүн Амандага рахмат» деп жазган ал бул сүрөткө. Велосипеддердин арасында турган эркек баланын сүрөтүн коюп, «Аманданын толук автопаркы бар» деп сыпаттаган.
Эки комментарий тең Медерова курбусу Тургунованын үйүндө эс алганын ишарат кылат.
Тургунова өткөн жайда жарыяланган сүрөт бир топ суроого жооп тапканга жардам берет. Кынаптап коюлган кыш Медерова былтыр койгон сүрөткө дал келет. Сары кыш менен ак түстөгү арка «Карвен» эс алуу жайынын архитектурасына төп келет (оңдо). Ак арканын алдындагы айнек дубал ижарага берилген коттеждерде жок, демек бул үй-бүлөгө тиешелүү коттедж деген ойго жетелейт.
Тургунова «Карвендеги» коттедждердин бирине байма-бай каттап турган, андыктан ал жерди ижарага алышы мүмкүн деген ойду четке кагат.
Кайсы коттедж болду экен?
2014-жылкы жандоочтон тартылган картага карасак, азыр салынган коттедждердин жарымы ал кезде жок. Сүрөттүн сол тарабында салынып бүтө элек үйлөр тартылган.
Кабарчылар сүрөттүн оң тарабындагы коттедждерге жакшылап көңүл бурушкан.
Тургунова жарыялаган эки сүрөт, анын бири Медерова менен чогуу түшкөнү бул сүрөткө кошумча түшүндүрмө берет. «YouTube» каналына чыккан, дрондон тартылган видео «Карвенде» бак-шак менен курчалган эки гана үй бар экенин көрсөтөт.
Дрондон тартылган башка видеону кабарчылар карап отуруп, бак-шактуу коттедждин бири Матраимовдун үйүнө төп келерине ынанышкан:
«Google Maps» аркылуу бул коттедж табылган соң кабарчылар үйгө барган жол үйдүн дубалдарына түз перпендикулярдуу эмес экенин байкашкан. Ошондой эле ал жер Медерова менен Тургунованын сүрөттөрүнө да төп келет.
Журналисттер жердин реестрин алып, үй Матраимовдорго тиешелүү экенин аныкташкан. Ал мүлк Райымбек Матраимовдун иниси Тилекбек Матраимовдун аялы Динархан Алайчиевага катталган экен.
Тургунова «Карвенден» 2019-жылдан бери сүрөт койгон эмес, бирок үй-бүлөдөн жок дегенде бирөө ал жерге барып турганы байкалган.
Быйыл июнда «Твиттердин» колдонуучусу Райымбек Матраимовдун уулу Бакай «Карвендин» ичинде «Aston Martin» үлгүсүндөгү машинени айдап бараткан сүрөтүн чыгарган. Ал ошондой эле Матраимовдордун үйүнүн алдындагы жолдо турган «Porsche Cayenne» машинесинин сүрөтүн да жарыялаган.
Дагы окуңуз:
Бажычынын байманасы ашып-ташыган жашоосу
Райымбек Матраимов - чириген байлыгы менен таанылган таасирдүү аткаминер. Анын жубайынын социалдык медиадагы барактары бул үй-бүлөнүн байманасы ашып-ташыган жашоосун чагылдырат.
Maтраимовдордун Дубайдагы апартаменти
Матраимовдун үй-бүлөсү ээлик кылган Дубайдагы мурда белгисиз кымбат баалуу пентхаусту журналисттер ачык булактарды казып отуруп таап чыгышты.
Көлбаев менен байланыш
Ысык-Көлдүн жээгиндеги менчик эс алуу жайы - кыргыз бажысынын мурдагы аткаминери Райымбек Матраимов менен кылмыш дүйнөсүнүн анабашы Камчыбек Көлбаевдин байланышынын дагы бир далили.
”Азаттык үналгысы" өз окурмандары жеке турмушунун купуялыгына акылуу жана эч көзөмөлсүз интернетти ачууга жана андан маалымат алууга укуктуу деп ишенет.
© 2020 RFE/RL, Inc.
