Матраимовдун үй-бүлөсү ээлик кылган Дубайдагы мурда белгисиз кымбат баалуу пентхаусту журналисттер ачык булактарды казып отуруп таап чыгышты.
Ал тууралуу алгач «Фейсбукта» бул үй-бүлөнүн балдарын баккан филиппиндик аял ачыкка чыгарган. 2016-жылы 6-ноябрда Teresita аттуу аял жаңы батирде тартылган видео экскурсия жарыялап, «бул менин боссумдуку» деп сыпаттаган. Видеодо ал «бул жерди биз жаңы эле сатып алдык» деп баяндайт.
Видео тарткан аял айтып жаткан «боссу» Уулкан Тургунова – Кыргызстандын Мамлекеттик бажы кызматынын төрагасынын мурдагы орун басары Райымбек Матраимовдун жубайы. Социалдык сайттарда Тургунова «Аманда» деген ат менен таанымал.
2017-июнда Teresita Тургунова менен сүрөткө көп түшкөн Чолпон Медерованын «Инстаграмдагы» постунун алдына комментарий калтырган (азыр Медерова ал постту өчүрүп салган). Teresita «Аманда кожойкесин» сагынып жатканын жазып, анын иштери кандай деп сурайт:
(Чолпон, кандайсың... Силерде баары жакшы деп үмүттөнөм. Менин кожойкем Аманда кандай. Аны абдан сагындым. Айрыкча биздин Ысык-Көлдө чогуу өткөргөн маалды... баарыңарды сагындым... )
Teresita «Фейсбукка» бул үй-бүлөнүн балдары менен да сүрөттөрүн чыгарган.
Ал ошондой эле жеке менчик фитнес залдагы сүрөттөрүнүн коллажын жарыялаган. Комментарийлерде бул жай анын кожойкеси (филиппин тилинде «amu») «үйүндө» жайгашканын түшүндүрөт.
Teresita апартаментте тарткан видеодо «Дубайдагы бул үйдү тазалап жатабыз, анткени жаңы эле сатып алдык» деп баяндайт.
Тургунованын 2016-жылдын ноябрына чейинки сүрөттөрүнөн «Le Royal Méridien» жана «Atlantis The Palm» сыяктуу кымбат мейманканаларда токтогонун көрсө болот. Teresita тарткан видеодон кийин Тургунованын постторунда мейманканадан эмес, апартаменттен түшкөн сүрөттөрү көбөйгөн.
Видео экскурсиядан бир күн мурдараак Teresita Дубайдагы апартаменттен түшкөн ондогон сүрөтүн «Менин кожоюнумдун үйү...» деп жарыялаган:
Кийинки жылы Тургунова балдары менен чогуу түшкөн сүрөттөрүн чыгарган. Таанымал кооз тепкич дароо көзгө урунат.
Тургунова апартаменттин ичинен дагы бир нече сүрөт койгон:
Teresita апартаменттин терезесине туруп түшкөн бул сүрөт имарат кайда жайгашканын аныктоого жардам берет:
Cүрөттөн жарым аралдагы пляж, деңиздеги жашыл жана күлгүн кызыл түстүү объектилер даана көрүнөт.
Дубайдын таанымал «Жумейра Бич Резиденси» (Jumeirah Beach Residence) районундагы комплексте үч объект тең бар. Суунун үстүндөгү объект - ал жердеги аквапарк үстүнөн караганда «I ❤️ Dubai» деген жазуу болуп көрүнөт.
Районду аныктап алгандан кийин имаратты издегенге кириштик. Ал жерде көп кабаттуу мунаралар бир нече. Сүрөт тартылган бийиктик, анда көрүнгөн аквапарк тараптагы пляж жактагы бурчту эсепке алганда бир гана имарат дал келди:
50 кабаттуу имарат - «Ал-Фаттан Марин Тауэрс» (Al Fattan Marine Towers) деп аталган кош мунаранын бири. Анын чоң терезелери Teresita түшкөн сүрөткө төп келет:
Инстаграмдагы «Ал-Фаттан Марин Тауэрс» деген сүрөт дал ошол панораманы, пляжды жана аквапаркты көрсөтөт:
Имаратты тапкандан кийин апартамент кантип аныкталды? Teresita видео тартып жатканда тепкич менен көтөрүлүп, апартамент дуплекс (эки кабаттуу) экенин көрсөтөт. Имараттын ички чиймеси боюнча буга 50-кабаттагы пентхаус гана туура келет. Анын терезелеринен айлана-тегерек алаканга салгандай көрүнөт.
Андан сырткары Тургунова 50-кабатка көтөрүлүп баратып лифттен түшкөн сүрөтү «Ал-Фаттан Марин Тауэрстеги» лифттин сүрөтүнө дал келет.
Мактанычтуу сапар
Быйыл январда Райымбек Матраимовдун өкүл баласы Мунарбек Сайпидинов «Инстаграмга» Дубайда баасы 200 миң долларлык «Mercedes Brabus G700» үлгүсүндөгү машинеден тартылган сүрөт койгон.
Google Maps view анын «Ал-Фаттан Тауэрске» барганын тастыктайт.
Дубайда кыймылсыз мүлккө байланыштуу маалымат купуя сакталгандыктан, Матраимовдор бул пентхаусту канчага сатып алганын далилдеген документтер жок.
Ошол эле имараттагы дал ушундай пентхаустун азыркы сатыкта турган баасы 3,850,000 дирхам (1 миллион долларга чукул каражат).
Аманда бул апартаменттен сүрөттөрүн жарыялаган маалда анын күйөөсү Райымбек Матраимовдун расмий маянасы 71 миң сом (1000 доллардай) эле. Анда бул үй-бүлө кантип мындай кымбат үй-жайды алды болду экен деген суроо туулат.
Анын декларациясында бул апартамент тууралуу сөз жок.
Райымбек Матраимов - чириген байлыгы менен таанылган таасирдүү аткаминер. Анын жубайынын социалдык медиадагы барактары бул үй-бүлөнүн байманасы ашып-ташыган жашоосун чагылдырат.
Ысык-Көлдүн жээгиндеги менчик эс алуу жайы - кыргыз бажысынын мурдагы аткаминери Райымбек Матраимов менен кылмыш дүйнөсүнүн анабашы Камчыбек Көлбаевдин байланышынын дагы бир далили.
Журналисттер ачык булактар аркылуу иликтөө ыкмаларын колдонуп, Матраимовдордун үй-бүлөсү Ысык-Көлдүн жээгиндеги байма-бай каттап турган коттеджди таап чыгышты.