«Азаттык» радиосуна Норвегияда миграциялык мыйзам бузуулар менен кармалгандар арасында кыргызстандыктар да барын, аларды Европага виза жасаган туристтик агенттик алдаганын айткан, өзүн кыргызстандыкмын деген адам видео жөнөттү.
«Документтерибиздин мөөнөтү бүтүп калган. Кээ бириники эки жума, кээ бириники бир ай жана 45 күндүк. Азыр биз камактабыз. Казак элчилигинен келишти. Бизди алып келген агенттиктин Прагада кеңсеси бар. Алар адамдарды алдап жатат. Күнүнө ондогон адамдар Европада жумуш таап берет деп 5-6 миң евро төлөп, кайрылат», - дейт видеодогу адам.
Иммиграциялык мыйзамдарды бузган 68 чет өлкөлүк камакка алынганын норвегиялык VG басылмасы полицияга шилтеме кылып 25-сентябрда жазган.
Анда басымдуусу казакстандыктар, алтоо Кыргызстандын жана экөө Орусиянын жараны экени кабарланган. Аларды полиция Эйдсволл шаарчасындагы мейманканада кармаган.
Берлиндеги кыргыз элчилигинен кыргыз жарандары тууралуу маалымат расмий органдар аркылуу такталып жатканын билдиришти.
- Норвегияда биздин элчилик жок. Консулдук кызматтар Берлинде көрсөтүлөт. Норвегияда кыргыз жарандары кармалган расмий маалымат келе элек. Медиага чыккан маалымат боюнча биз тиешелүү органдарга кайрылып, тактайбыз, - деди Мират аттуу кызматкер.
Казак өкмөтү учурда Норвегияда кармалган 60 жаранын өлкөдөн чыгарып кетүүгө аракеттенип жатат. Ослодогу казак элчилигинин өкүлү Талгат Жумагулов «Азаттыктын» казак кызматына кармалгандар Европага туристтик виза менен келип, визаларынын мөөнөттөрү өтүп кеткенин айткан.
«Иштери каралууда. Жакынкы арада Казакстанга жөнөтөбүз. Кармалгандар туристтик виза менен келип, калууну көздөшкөн» деген Жумагулов.
Казак элчилиги өлкөнүн расмий органдарына жагдай кабарланганын, жарандарды Европага алып келген туристтик агенттикке тиешелүү чара көрүлө турганын белгилеген.
Казакстанда соңку жылдары теңгенин куну качып, элдин кирешеси азайгандыктан чет өлкөгө иш издеп кеткендер көбөйгөн. Тышкы иштер министрлиги өткөн жылы Түштүк Кореяда казакстандык 10 миңдей мигрант бар экенин маалымдаган. Орусиянын миграциялык кызматынын билдиришинче, быйыл жыл башынан бери 100 миңден ашык казак жараны иш издеп кеткен.
Ал эми кыргыз өкмөтү чет өлкөлөрдө бир миллиондой жаран эмгек миграциясында жүргөнүн кабарлап келет. Европа өлкөлөрүндөгү кыргызстандыктардын саны 30 миңдей, басымдуусу студенттер.
«Азаттыктын» материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.
