Акыйкатчы институту өз кызматкерлери бир мандаттуу №26 Ленин шайлоо округу боюнча парламент депутатын шайлоого мониторинг жүргүзүп жатканын билдирди.
Маалыматка караганда, байкоо жүргүзүш үчүн институтта атайын штаб түзүлгөн. Кызматкерлер добушканалардагы шайлоонун жүрүшүнө байкоо салып, анкета боюнча сурамжылоо жүргүзүлүп жатат.
Анда майыптыгы бар шайлоочулардын укуктарынын корголушуна көңүл бурулууда. Добушканаларда мониторинг жүргүзө турган көчмө топ уюштурулган.
Саат 11.00дөгү маалымат боюнча алар эреже бузуу катталган 11 добушканада болгон жана ал маселелер жеринде чечилген. №1035 участкалык шайлоо комиссиясындагы (УШК) байкоочулардын айтымында, 15ке чукул шайлоочу эртең мененки саат 8ден 8.30га чейин монитордон өтпөй добуш берүүгө кирип кетишкен. Байкоочулар алар тууралуу маалыматты көрүшкөн эмес.
"УШКнын мүчөлөрүнүн маалыматына таянсак, алар дароо техникалык колдоого байланышып, системаны кайра иштетишкен, ошентсе да бюллетендер квитанциялар боюнча берилген. №1046 участокто байкоочулардын бири добуш берип жаткандардын паспортунун жеке маалыматын сүрөткө тартып алган. Институттун дагы бир бир тобу ЖМКдагы жана социалдык тармактардагы жарандардын укуктары бузулуп жатканы тууралуу кабарларга байкоо салууда. Анын жыйынтыгында зарыл болгон учурда компетенттүү органдарга жана эл аралык уюмдарга тиешелүү сунуштамалар берилет", - деп жазылган маалыматта.
Борбордук шайлоо комиссиясы Бишкектеги бир мандаттуу №26 Ленин шайлоо округундагы добуш берүүнүн баштапкы жыйынтыгын жарыялады. Ага ылайык, Дамира Ниязалиева 6073 добуш алып, алдыга чыкты.
БШКнын маалымдашынча, добуш берүүгө бул округдагы шайлоочулардын 13,95% гана катышты. Аймакта 125 миңдей шайлоочу катталган.
Буга чейин Ички иштер министрлиги Ниязалиеванын штабында иштейт деген үгүтчүлөргө байланыштуу добуш сатып алуу фактысы иликтенип жатканын кабарлаган.
Дамира Ниязалиева буга чейин Жогорку Кеңештин эки чакырылышында депутат болгон. Ал вице-премьер-министр кызматын аркалаган. 2010-жылдагы Убактылуу өкмөттүн тушунда кыска мөөнөттө саламаттык сактоо министри болуп турган.
БШКнын маалыматына караганда, Бишкектеги бир мандаттуу №26 Ленин шайлоо округунан парламент депутаттыгына талапкер болгон жана абакта отурган Равшан Жээнбеков 328 (2,30%), Акыл Айтпаев 829 (5,82%), Илгиз Сарылдык уулу 38 (0,27%) добуш алды.
Шайлоодо 29 талапкер ат салышты. Алардын үчөө - Жээнбеков, Сарылдык уулу жана Айтпаев Кемпир-Абад ишине байланыштуу тергөө абагында кармалып турат.
Бул иш боюнча кармалгандарга алгач “массалык башаламандык уюштуруу” деген берене коюлган. Жакында эле Кылмыш жаза кодексинин 326-беренесине (“Бийликти күч менен басып алуу”) кошулганы белгилүү болгон.
№26 Ленин шайлоо округунан Жогорку Кеңештин депутаттыгына талапкерлигин коюп, баштапкы жыйынтык боюнча алдыга чыккан Дамира Ниязалиева өз дарегине айтылган айыптоолорго жооп берди.
Ал 28-майда билдирүү таратып, социалдык тармактарда жарыяланган видеолорду "атаандаштардын каралоосу" катары сыпаттаган. Бирок ал эч кимдин атын атаган эмес.
"Видеодогу жарандардын менин шайлоо штабыма эч кандай тиешеси жок. Бул өз күчүнө ишенбеген оппоненттердин ыплас провокациясы. Буга байланыштуу укук коргоо органдарына кайрылып, аталган талапкердин аракетине баа берип, мыйзамда каралган чараларды көрөбүз. Видеодогу аялдар милицияга жеткирилип, тергөө иштери жүрүп жатат. Бул ишке укук коргоо органдары чекит коет. Биздин алдын ала маалымат боюнча алардан өздөрүнүн акчасы гана табылган", - деп билдирген ал.
БШКнын маалымдашынча, 28-майдагы добуш берүүгө бул округдагы шайлоочулардын 125 миңдей шайлоочунун 13,95% гана катышты. 29 талапкердин ичинен алдыга чыккан Дамира Ниязалиевага шайлоого келген 17 423 адамдын 35%, же болбосо 6 242си добуш берген.
Азыркы эсеп боюнча 1 317 добуш менен үчүнчү болуп келген талапкер Эртай Искаков буга чейин Ниязалиеваны добуш сатып алууга айыптап чыккан. Ал бир нече адамдын акча санап отурган видеосун таратып, алар Ниязалиеванын тарапташтары экенин билдирген.
ИИМ териштирүү жүрүп жатканын маалымдап, бирок эч бир талапкердин ысымын атабады.
Боршайкомдун билдирүүсүндө, мекемеге эреже бузуулар боюнча тогуз арыз түшүп, алты кайрылууда айтылган маалыматтар тастыкталган эмес. Ал эми үч арыз боюнча укук коргоо органдары териштирүү жүргүзүп атат.