Биздин арабызда сыртынан башкалардан айырмаланбаган, бирок ошол эле учурда интеллектуалдык жактан өзгөчө адамдар жашашат. Аларды көбүнчө бир көргөндө өтө жоош же өтө шок адам катары мүнөздөшөт. Булар –аутисттер.
Аутисттер – аутизм оорусунан жабыркаган адамдар. Мурдараак Советтер союзунун тушунда батыштын оорусу, азыр болсо айрым учурларда цивилизациянын илдети деп айтыла калып жүргөн аутизм оорусу кандай оору?
Бишкекте акыл-эс жөндөмдүүлүгү өзгөчө балдар үчүн атайын үч мектеп бар. Бул мектептердин бирине аутист балдардын ата-энелери эл аралык уюмдардын жардамы менен атайын класс ачышкан.
Бүгүнкү күнү аутист деп диагноз коюлган балдарын кучактап алып, андан ары кайда алып барарын билбеген ата-энелер ондоп саналат. Бишкекте аутист балдарды башка балдар менен кошуп, инклюзивдик билим берип жаткан дагы бир Балдардын угуусун жана сүйлөөсүн өрчүтүүчү борбор бар. Аталган борбордогу балдардын баары эле аутист эмес. Бирок балдарды аралаштырып окутуу алардын эртерээк ийгиликке жетүүсүнө мүмкүнчүлүк түзөт дешет борбордун адистери.
