14:17
8.10.2013
Мамытов: Эгер коркунуч жаралса, тиешелүү чара көрүлөт
Жети-Өгүз районунун элине жана жалпы эле коопсуздукка коркунуч жарала турган болсо митингчилерге карата тиешелүү чара көрүлөт. Бул тууралуу "Азаттыкка" күч түзүмдөрү боюнча вице-премьер-министр Токон Мамытов билдирди. Анын айтымында, окуя болуп жаткан жакта тартип коргоо кызматкерлери жана тиешелүү күч жетиштүү, андыктан көл тарапка Бишкектен кошумча күч жөнөтүлгөн жок.
Жети-Өгүз районунун элине жана жалпы эле коопсуздукка коркунуч жарала турган болсо митингчилерге карата тиешелүү чара көрүлөт. Бул тууралуу "Азаттыкка" күч түзүмдөрү боюнча вице-премьер-министр Токон Мамытов билдирди. Анын айтымында, окуя болуп жаткан жакта тартип коргоо кызматкерлери жана тиешелүү күч жетиштүү, андыктан көл тарапка Бишкектен кошумча күч жөнөтүлгөн жок.
"Саруунун үстүн тегеренип жүргөн эмне тик учактар?" деген суроого жооп берип жатып Токон Мамытов ал Кыргызстандын куралдуу күчтөрүнүн тик учактары экенин, алар кырдаалга көз салып, эгер оор жараат алгандар болсо, алып кетүү үчүн жөнөтүлгөнүн билдирди.
Кечээ Караколдо өкмөттүн өкүлүн барымтага алуу жана башаламандык менен коштолгон митингди күчтөп таратуу учурунда 10 киши, анын ичинде 5 милиционер жараат алган болчу. Азыр Караколдо тынч, бирок Саруу айылында 200дөй киши чогулуп, жол тосулуп турат, атайын кызматтын бир унаасы өрттөлүп жатат.
14:07
8.10.2013
Жол тосуу бекемделди
Саруу айылында нааразылыкка чыккандар жол тосууну мурдагыдан да бекемдеп, чоң жүк ташуучу машинени туурасынан коюп коюшту.
13:34
8.10.2013
- автор Мария Колесникова
Митингди уюштуруучулардын бири Аблас Усенбаевдин “Азаттыка” билдиришинче, чогулгандар “Кумтөр” меморандумунун кабыл алынышына каршы. Алар буга чейин Кумтөргө байланыштуу митингге чыгып, камалгандарды бошотуу талабын да коюшту.
Усенбаев эгер бийлик күч колдоно турган болсо, каршылык көргөзө тургандыктарын, бул үчүн атайын 100 атчан камдалганын, бензин куюлган бөтөлкөлөр даяр экенин билдирди.
Учурда жол оор жүк ташуучу унаалар менен тосулуп турат.
13:08
8.10.2013
Сарууда жол тосулду
Сарууда жол жабылды
Жети-Өгүз районунун Саруу айылындагы Кашат көпүрөсүнүн үстүндө эл чогулуп турат. Ысык-Көл облустук милициясынан кабарлашкандай, Бишкек - Каракол унаа жолунан Саруу, Дархан айылдарына кетчү жол буулду. Чогулгандардын саны 400дөй киши. Жол жабылган жерде бир автоунаа аңтарылып жатат. Мария Колесникова, "Азаттык"