Бишкектин Биринчи май райондук соту “Ата Мекен” партиясынын түрмөдө жаза мөөнөтүн өтөп жаткан лидери Өмүрбек Текебаев менен мурдагы министр, экс-элчи Дүйшөнкул Чотоновдун бөгөт чарасын өзгөрттү.
Соттук жараянга адвокаттар, Жогорку Кеңештин айрым депутаттары, жакын туугандарынын башкалар киргизилген жок.
Сот жабык өтүп, журналисттерге уруксат берилбеди. 200дөн ашуун партиянын мүчөлөрү, тарапташтары Текебаев менен Чотоновдун сүрөтүн, партия желегин жана гүл көтөрүп сыртта күтүп турушту.
“Ата Мекен” партиясынын лидери Өмүрбек Текебаев сот залынан чыккандан кийин тарапташтарынын алдында сүйлөдү.
"Соттун имараты эле эмес, судьялардын жан дүйнөсү да жаңыланышы керек. Аларда жаңы салт, жаңы норма, принциптер пайда болушу шарт. Ошондо гана сот реформасы жүрөт. Ага жарандардын салымы чоң. Ар бир район, айылда туура эмес ишке каршы чыкса соттор туура чечим чыгарганга мажбур болот... Биз эле эмес саясий мотивде жаткан башка туткундардын, анын ичинде Садыр Жапаровдун, жалган жалаа менен камалган жөнөкөй карапайым балдардын иши да кайра каралышы керек", - деди Текебаев.
Текебаев сот бул жолу акыйкат чечим чыгарат деген ишеничин билдирди.
Жаңы ачылган жагдайларга байланыштуу сот иши 14-сентябрга белгиленди.
Экс-президент Роза Отунбаева «Ата Мекен» партиясынын лидери Өмүрбек Текебаев менен экс-министр, мурдагы элчи Дүйшөнкул Чотоновдун абактан чыгышын тарыхый күн деп атады. Бул тууралуу ал үй камагына чыккан саясатчыларды партиянын кеңсесинен тосуп алган учурда билдирди:
«Акыйкат келди, бар экен. Бүгүн Кыргызстандын саясий тарыхында өзүнчө көрүнүктүү күн болуп атат. Бүгүн ага баарыбыз күбө болуп жатабыз. Кырдаал канчалык кыйын болбосун эки азамат башын ийбей туруп беришти. Биз Сингапурдай жашап кетпейбиз, бирок биздин системаны күчтөндүрөлү, бийликти акыйкаттыкка алып келели деп баарыбыз күрөшүп жаттык. Азыркы күн - ошонун жыйынтыгы».
Отунбаева ушул күнгө чейин бирге туруп берген партия жана фракция мүчөлөрүнө, адвокаттарга ыраазычылык билдирди.
Парламенттин мурдагы төрагасы Медеткан Шеримкулов Текебаев менен Чотоновго кайрылып, эч качан бирөөгө кек сактап, өч албоого чакырды:
«Эки жылдан ашуун жаттыңар. Ар кандай пикирде, көз карашта болдуңар. Агаңар катары айтарым, эч убакта бирөөдөн өч алам деп аракет кылбагыла. Эч кимге теңелбегиле, силерге ким жамандык кылбасын, бут тоспосун, алардан бийик болгула. Кайран өмүрүңөр кетет. Жашыңар, акыл-эсиңер, ден соолугуңар ордунда турганда Кыргызстандын келечеги, мамлекеттүүлүк, элдин турмушун оңдоо, биримдигин чыңдоо аракетиңерден жазбагыла».
Адвокат Таалайгүл Токтакунова «Азаттыкка» билдиргендей, жактоочулар соттон саясатчылардын бөгөт чарасын өзгөртүп, тилкат менен абактан бошотууну өтүнүшкөн.
Жогорку сот 21-августта Өмүрбек Текебаев менен Дүйшөнкул Чотоновдун ишин жаңы ачылган жагдайларга байланыштуу карап, мурдагы чечимдердин баарын жокко чыгарган. Иш райондук сотко кайра кароого жөнөтүлгөн.
«Ата Мекен» партиясынын түрмөдө жаза мөөнөтүн өтөп жаткан лидери Өмүрбек Текебаев менен экс-министр, мурдагы элчи Дүйшөнкул Чотонов «орусиялык жаран Леонид Маевскийден пара алды» деген көрсөтмөнүн негизинде 2017-жылы ар бири сегиз жылдан түрмөгө кесилген.
Сүрөт баян: Текебаев менен Чотоновдун үй камагына чыгышы
