"Азаттык": Жарандык коом өкүлдөрүнөн тышкары бул маселени өзүңүздүн кесиптешиңиз, БШКнын мүчөсү Ишенбай Кадырбеков да көтөрдү эле. 2013-2014-жылы БШК миллиондогон сомдорду негизсиз коротту деген маалыматтар канчалык жүйөлүү?
Акматов: Бул акчанын баары солго кетти деген дооматтар туура эмес. Анткени ар бир сарпталган акчанын орду бар. Ишенбай Кадырбеков бул маселени БШК мүчөлөрүнүн арасында да көтөргөн. Биз талкуулап, анда эч кандай мыйзамсыз аракеттер жок экенин айтканбыз. Ал андан кийин президентке жана Эсеп палатасына да кайрылган болчу. Эсеп палатасы да бул маалыматтар боюнча толук текшерүү жүргүзүп, эч кандай кынтык жок экенин билдирген. Ошондон кийин Кадырбеков муну маалымат каражаттарына жарыялаптыр.
"Азаттык": Эми жарандык коом БШК мүчөлөрү да бул маалыматтар боюнча отчет берсин деп талап кылып жатышат. Сиздер отчет берүүгө даярсыздарбы?
Акматов: Албетте. Анткени БШКнын эл аралык коомчулукта, эл аралык уюмдардын алдында алган милдеттенмелери бар. Мамлекеттер аралык макулдашууларга ылайык, БШКнын мүчөлөрү, аппараттын кызматкерлери ар бир өлкөдө өткөн президенттик, парламенттик шайлоолорго байкоочу катары барып катышууга милдеттүүбүз. Ошонун баарына барып-келүүгө каражат талап кылынат.
Кадырбеков төраганын сапарлары көбөйгөнүн, көп каражат сарптаганын айтыптыр. Анткени төрага башка мүчөлөргө салыштырмалуу көп чыгат, ар кандай жолугушууларга барып, келишимдерди түзүп, кол коюуга милдеттүү.
Мына быйыл шайлоо келатат, анда жаңы технологияларды колдонуу боюнча эл аралык жармаңке өткөрдүк. Мына ушулардын баарына каражат сарпталат. Кадырбеков өзү деле Молдавияда, Боснияда өткөн шайлоолорго байкоочу болуп барып келди. Жакында эле Шри-Ланкага бардык. Негедир маалыматтарында бул тууралуу айтылбаптыр.
"Азаттык": Быйыл боло турган парламенттик шайлоо тууралуу кеп козгоп калдыңыз. 17-майда жергиликтүү кеңештерге шайлоодо жаңы технологиялар жакшы иштебей, добуш берүү үзгүлтүккө учураганы айтылып, нааразылыктар чыкты. Күзүндө парламенттик шайлоодо мындай болбойбу?
Акматов: Айылдык кеңештерде шайлоодо эки жаңы технология сыноо иретинде колдонулду. Санариптик добуш берүү үкөктөрү жакшы иштеди, эч кандай мүчүлүштүк болгон жок. Ал эми шайлоочулардын тизмесин биометрикалык маалыматтардын негизинде түзүп, идентификациялоодо бир аз мүчүлүштүктөр болду. Бирок каттоо кызматынын кызматкерлери бул кемчиликтерди оңдоого толук мүмкүнчүлүк бар деп айтып атышат. Алдыда дагы үч ай бар, шайлоо системасын жакшыртууга убактыбыз кенен.
