Мамлекеттик чек ара кызматынын коомчулук менен байланыш бөлүмү билдиргендей, 12-октябрда кечки саат 19.00гө карата кыргыз-казак чек арасында элдин топтолуусу байкала элек.
Мекеме кыргыз-казак чек арасындагы көзөмөл-өткөрмө бекеттеринде абал туруктуу экенин, чек ара тартибин бузган учурлар катталбаганын кошумчалады.
Казакстан менен чектешкен “Ак жол” жана башка өткөрмө бекетинде 10-октябрдан бери узун кезек пайда болуп, миңдеген эл бир нече саат жөө жана машине менен чек арадан өтө албай турган. "Азаттыктын" кабарчылары 11-октябрда түштөн кийин барып, өтө албай турган бир топ жүргүнчүлөрдү, айдоочуларды кезиктирген.
Чек ара кызматынын билдиришинче, 11-октябрда түнкү саат 11де казак чек арачылары текшерүүнү күтүүсүз жеңилдеткен жана топтолгон жолоочулардын баары 1,5 сааттын ичинде өтүп кеткен. Бирок 12-октябрда эртең мененки саат 8де казак тарап кайрадан өтүү шарттарын катаалдаткан.
Ошол эле учурда кыргыз чек арачылары Казакстандан келе жаткан жарандарды эч тоскоолдуксуз өткөрүүдө.
Буга чейин премьер-министр Сапар Исаков бир канча сааттан бери кезек күтүп турган жүргүнчүлөр баш калкалай турган чатыр тигип, ысык тамак уюштурууну тапшырган. Саламаттыкты сактоо министрилигин күнү-түнү медициналык жардам көрсөтүүнү уюштурууга милдеттендирген.
Чүй облусуна караштуу Аламүдүн районунун акими Касым Чодуров 60 адамдан турган топ экиге бөлүнүп тейлеп жатканын айтып берди:
- Түндө бул жакта кызмат кылган, тейлеген балдар кетип, эртең менен башкалар келди. Жүргүнчүлөрдүн саны кескин көбөйүп кетсе, ошолорду тейлейли деп бардык даярдыктарды көрүп жатабыз. Кошумча чатырларыбыз да даяр. Бул жерде дарыгерлер да күнү-түнү турат. Түндө кан басымына байланыштуу онго жакын адам аларга кайрылды. Ысык чайыбыз, тамагыбыз даяр. Айрым маалыматтар боюнча, "Ак тилек" өткөрмө бекетинде унаалар салыштырмалуу аз деп жатат. Биз айрым жүк ташыган, эл ташыган унааларда ошол бекетке баргыла деп да сунуштап жатабыз. Андан сырткары эрте бузулуп кетчү товар ташып бараткан унааларды өзүнчө жол менен чыгарууну караштырдык.
Чаташкан маалыматтар
11-октябрда кечинде өкмөттүн маалымат кызматы премьер-министр Сапар Исаков менен Казакстандын президенти Нурсултан Назарбаев менен чек арадагы жагдайды талкуулаганын жана Назарбаев жагдайды жөнгө салуу боюнча тапшырмаларды бергенин билдирген.
Бирок бүгүн Казакстан бул маалымат боюнча комментарий берип, кыргыз өкмөтүнүн маалыматын төгүндөдү.
Казакстандын премьер-министри Бакытжан Сагинтаевдин маалымат кызматы тараткан билдирүүдө Кыргызстандын премьер-министри Сапар Исаковдун ортосунда сүйлөшүү болбогону, анын Назарбаевге басып барып кыска убакытка маектешүү болгону гана белгиленген.
“Экинчиден, "Казакстан президенти өкмөткө чек арадагы маселени чечүүгө тапшырма берди” деген маалымат чындыкка жатпайт. Бул маселе боюнча өкмөттөр аралык кеңешүүнү өткөрүү боюнча тапшырма берилген”, - деп жазылат Сагинтаевдин расмий сайтына жарыяланган билдирүүдө.
Муну менен катар казак премьер-министринин маалымат кызматы бурмаланбаган, так маалымат таратуу үчүн бардык маалымат каражаттар менен иштешүүгө даяр экенин билдирген.
Кыргыз өкмөтүнүн маалыматтык камсыздоо бөлүмү буга жооп иретинде премьер-министр Сапар Исаковдун Казакстандын президенти Нурсултан Назарбаевдин сүйлөшүүсү тууралуу билдирүүсүнө түшүндүрмө берди. Анда өкмөт башчынын Фейсбук социалдык тармагындагы расмий баракчасына жайгаштырылган маалыматта премьер-министр казак президенти менен эки мамлекеттин чек арасындагы көзөмөл-өткөрмө бекетиндеги абал жөнүндө баарлашканы, бирок эки тараптуу толук сүйлөшүү болбогону жазылганы белгиленген.
"Назарбаев маселени түшүнүп жатканын көрсөтүп, түзүлгөн бардык маселени чечүү тапшырмасын берерин белгиледи. Буга байланыштуу Сочидеги Жогорку Евразиялык экономикалык кеңештин чакан чөйрөдөгү жыйынынын соңунда премьер-министр Сапар Исаков казак президентине маселени ыкчам жана оң жагына чечкени үчүн ыраазычылык билдирди. Ага жооп иретинде Назарбаев кыргыз элине жардам берүүгө жана эки тараптуу алаканы өнүктүрүүгө дайым даяр экенин айтты. Премьер-министр Назарбаев менен сүйлөшүүлөргө жана казак тараптын чек арадагы кырдаалды тез арада чечүү зарылдыгын түшүнгөнүнө таянуу менен коомчулукка маалымат берди" - деп жазылган өкмөттүн билдирүүсүндө.
Мындан тышкары өкмөт Казакстан чек арадагы пландуу операцияларын кыска убакытта аяктап, көзөмөл-өткөрмө бекетинин иши калыбына келтирилет деген ишенимин кошумчалады.
Ал арада чек арада кезек күткөндөрдүн айрымдары текшерүүнүн катаалдашын президент Алмазбек Атамбаевдин казак бийлигин сындаганы менен байланыштырууда. Казакстандын Чек ара кызматы “пландуу чек ара операциясы” жүргүзүлүп жатканына байланыштуу өткөрмө бекеттен жарандарды, транспорт каражаттарын, жүктү, товарларды текшерүү күчөтүлгөнүн жарыялаган.
Чек арада жол азабын тарткандар
