Жээнбеков-Атамбаев: бийликти сынаган бир жыл

Кыргызстандын президенти Сооронбай Жээнбековдун бийлик чылбырын колго алганына бир жыл болду. Президенттин акыркы апталардагы коомдук-саясий чөйрө менен байма-бай жолугушуп, өлкөнүн өнүгүшүнө байланышкан маселелерди талкуулап жатканы бир жылдык ишин жыйынтыктоо ишарасы катары бааланууда. Маалымат каражаттарында, коомдук-саясий чөйрөлөрдө да президент Жээнбековдун бир жылдагы ийгиликтери жана өксүктөрү саналып жатат. Анткен менен Сооронбай Жээнбековдун президенттик бир жылында элдин назарында турган башкы маселе - мурдагы президент Алмазбек Атамбаев менен олку-солку мамилеси болду деген пикир коомчулукта басымдуу.