45 жаштагы Нурбек Болотов Голливудду баш кылып көп өлкөлөрдө баш-аягы кыркка жакын белгилүү тасмаларга тартылып жүргөн мыкты кыргыз каскадерлорунун бири.
Дүйнөлүк кино компанияларда биздин каскадерлорго талап күчтүү, себеби, кыргыздар көчмөн турмушту жакшы билип, ат үстүндө ойноп шамдагай келет. Нурбек менен иштешкен топтогу каскадерлор ар тараптан машыгуудан өткөн. Жергиликтүү кино тармагында кыргыз каскадерлору катышкан тасмалар аз тартылат. Ошондуктан бул кесипти аркалагандар көбүнчө Казакстанда иштеп, чет өлкөлөргө да Казакстандын атынан чыгышары айтылып келет.
Жаш каскадерлордун бири 24 жаштагы Зияшты акыркы кезде тартылып жаткан тасмалардагы уруш-мушташ эпизоддорунан көрүп келебиз. Зияштын айтымында, каскадерлукка кызыккан улан-кыздар көп болгону менен алардын көпчүлүгү темирдей катуу тартип, машыгууларга чыдабай кетип калышат.
Аз күн мурун Москва шаарында мобилдик технологиялар боюнча өткөн регионалдык сынакта Кыргызстандан барган ArtAsian тобу биринчи орунду ээледи. Сынакка Кыргызстан, Орусия, Армения, Казакстан, Грузия, Тажикстан жана Өзбекстандан барган командалар катышкан. Орусияда өткөн сынакта жеңүүчүлөргө 25 миң доллар ыйгарылып, Барселонада өтө турган эл аралык сынакка жолдомо берилди. Аталган сынактын финалы 21-февралда Испанияда өтөт. Анда дүйнөнүн булуң-бурчунан миңдеген стартап долбоорлор биринчилик үчүн ат салышмакчы.
