19:25
Күч түзүмдөрү Кой-Таштагы Атамбаевдин үйүнө киришти, бирок ал чыга элек
Ички иштер министрлигинин (ИИМ), Улуттук коопсуздук боюнча мамлекеттик комитеттин (УКМК) күчтөрү Кой-Таштагы Атамбаевдин үйүнө киришти. Бирок алар үйдүн ичинде ким бар-жогун айтпай жатышат. Уюктук жана Интернет байланышы жок. Күч түзүмдөрү Атамбаевдин тарапташтарын көздөш жаш чыгаруучу газ жана башка атайын каражаттар менен качырышты.
Окуя болгон жерде «Тез жардам» машинелери жүрөт.
Атамбаевдин Кой-Таштагы үйүнөн анын тарапташтарын айдап чыгышканы менен, Кой-Таштын кире беришинде адамдар күч органдарынын өкүлдөрүнө дагы эле таш ыргытып жатышат. Күч органдары атайын каражаттарды колдонууда.
Үй тарапка ӨКМдин кызматкерлери атайын техника менен келишти, бирок эмнени ачары белгисиз.
19:25
Мурдагы президент Алмазбек Атамбаевдин Кой-Таштагы үйүндө тиреш уланууда.
“Азаттыктын” кабарчысы жеринен маалымдаганына караганда, Ички иштер министрлигинин, Улуттук коопсуздук боюнча мамлекеттик комитеттин, Өзгөчө кырдаалдар министрлигинин өкүлдөрү Атамбаевдин үйүнө киришти. Бирок ичинде ким бар-жогун айтпай жатышат. Операцияга 1,5-2 миңдей милиционер катышууда.
19:44
Ооруканаларга жабыркап түшкөндөрдүн аягы токтой элек
Саламаттык сактоо министрлигинин 18:50гө карата берген маалыматына караганда, Кой-Таштагы окуяларга байланыштуу Травматология жана ортопедия илим изилдөө борборуна жараат алган беш киши келип түштү. Алардын арасында ок тийген күч түзүмдөрүнүн төрт өкүлү бар. Бирөө жөнөкөй жаран, ал кулак тундуруучу гранатадан жабыркаган. Бардыгынын абалы туруктуу.
19:30
Мурдагы президент Атамбаев кармалды
Бир катар маалымат каражаттары мурдагы президент Алмазбек Атамбаев атайын операциянын экинчи күнүндө колго түшкөнүн кабарлашты. Азырынча бул маалыматты расмий органдар ырастай элек.
Мурдагы президент Алмазбек Атамбаевди кармоо операциясы бүгүн, 8-августта саат 16ларда башталган. Милиция темир дарбазаны чопкутталган машине менен сүзүп кирип, Атамбаевдин тарапташтарын короодон сыртка сүрүп чыгарган. Анда кулак тундуруучу, көздөн жаш агызуучу каражаттар колдонулганын «Азаттыктын» кабарчысы окуя болгон жерден кабарлаган.
7-августта мурдагы президент Алмазбек Атамбаевди кармоо операциясы ишке ашпай калган. Операция учурунда күч органдары менен мурдагы президенттин тарапкерлери кагылышып, бир нече киши жабыркады. Алардын арасында атайын кызматтын аскерлери жана милиция кызматкерлери бар. Кагылышта башына таш тийип, оор жараат алган Чүй милициясынын башчысы Самат Курманкуловго эки жолу операция жасалды. Азырынча ал эсине келе электигин дарыгерлер билдирип жатышат. Күч түзүмүнүн бир өкүлү курман болду.
Башкы прокуратура Кой-Таштагы окуя боюнча Жазык кодексинин алты беренесинин негизинде («Массалык башаламандык», «Бейбаштык», «Киши өлтүрүү», «Киши өлтүрүүгө аракет кылуу», «Бийлик өкүлдөрүнө карата зомбулук» жана «Туткунга алуу») кылмыш ишин козгоп, ИИМ сотко чейинки тергөө амалдары башталганын билдирди.