"Реформа" партиясы 11-июлда Бишкек шаардык кеңешине өткөн кайра шайлоонун жыйынтыгын тааныбайт. Бул тууралуу партия "Фейсбуктагы" расмий баракчасында билдирүү таратып, саясий өнөктүктө айрым партиялар добуш сатып алганын, админстративдик ресурс колдонулганын жүйө келтирди.
"Реформа" Борбордук шайлоо комиссиясын жана башка комптенттүү органдарды шайлоодогу мыйзам бузууларды тыкыр иликтөөгө чакырды. Бирок партиянын билдирүүсүндө кайсы партиялар мыйзам бузганы ачык көрсөтүлгөн жок.
Мурдараак "Туран" партиясынын өкүлдөрү да шайлоонун жыйынтыгына нааразы болуп, БШКнын имаратынан алдында каршылык акциясын өткөрүүгө камынып жатышканын айтышкан.
Бишкектеги шайлоого 18 партия ат салышып, баштапкы жыйынтыкта алтоо утуп чыкканы расмий кабарланды. Алар "Эмгек", "Ата-Журт-Кыргызстан", "Ишеним", "Ынтымак", "Өнүгүү-Прогресс" жана Социал-демократтар партиялары.
"Реформа" партиясы 6% жакын, "Туран" 0,38% добуш алган.
Борбордук шайлоо комиссиянын (БШК) сайтына 130 кибер чабуул аракети болду. Бул тууралуу БШКнын төрайыма 11-июлдагы шаардык кеңештерге шайлоонун жыйынтыгы тууралуу маалымат бергенде айтты:
-Киберчабуулдар он мамлекеттен жасалды. Коопсуздук системасы аркылуу бул чабуулдар ийгиликтүү жоюлду, - деди Шайлдабекова.
БШКнын сайты Бириккен Улуттар Уюмунун Өнүктүрүү программасы аркылуу иштелип чыккан. Ошондой эле сайтты өнүктүрүүгө ондон ашуун эл аралык уюмдар өнөктөштүк колдоо көрсөткөн.
11-июлда Бишкек, Ош, Токмок шаардык кеңештерине кайра шайлоо өттү. Катышуунун көрсөткүчү 30% ашты.
