Саат 10:00гө карата 3% жакын шайлоочу добуш берди. Бул тууралуу Борбордук шайлоо комиссиясынын төрайымы Нуржан Шайлдабекова түз эфирдеги брифингде билдирди.
Шайлоо мыйзамдарына ылайык, элдин канчасы добуш берсе да шайлоо өттү деп жарыяланат.
Шайлоого Оштун Өзгөн районунун тургундары жигердүү катышып жатат. Чүйдүн Сокулук, Аламүдүн жана Ысык-Көлдүн Ак-Суу райондорундагы көрсөткүч салыштырмалуу төмөн болууда.
Президент Садыр Жапаров Бишкекте добуш бергенден кийин элге кайрылып, шайлоого активдүү катышууга чакырды.
БШКнын ыкчам аракет көрүү тобуна эртең мененки саат 11ге чейинки мыйзам бузуулар боюнча жалпы 106 арыз түшкөн. Бул тууралуу БШК төрайымынын орун басары Тынчтыкбек Шайназаров басма сөз жыйынында билдирди.
Шайназаровдун айтымында, былтыркы 4-октябрдагы шайлоодо бул маалга карата 400дөн ашуун мыйзам бузуу катталган эле.
"Бир жыл мурдагы эсепке салыштырмалуу быйыл мыйзам бузуулар 4,5 эсеге аз катталууда. Жалпы кайрылган 106 арызды мүнөздөп өтсөк, 54ү шайлоочулардын добушун сатып алуу, сегизи үгүт иштерининин шарттарын бузуу, 37си административдик ресурсту колдонуу, үчөө шайлоо фондунан тышкары каражаттары пайдалануу боюнча. Төртөө ар кандай өңүттөгү мыйзам бузууларга байланыштуу".
Тынчтык Шайназаров кайрылуулардын негизинде козголгон жети кылмыш иши соттук кароого жиберилгенин, 17 кылмыш иши боюнча тергөө аракеттери жүрүп жатканын айтты. Андан тышкары БШК тарабынан 20 талапкерге кат жүзүндө эскертүү берилген. Ошондой эле 35 талапкерге жана алардын тарапташтарына айып пул салынган. Анын суммасы 292 миң сомго жетет.
1148-шайлоо округунда байкоочулар бюллетендерди сүрөткө тартып жаткан учурду байкап калышкан.
Бүгүн, 28-ноябрда парламенттик шайлоого карата Анкарадагы Кыргызстандын элчилигинде, Стамбулдагы жана Анталиядагы Башкы консулдуктарында үч шайлоо тилкеси ачылды. Бул тилкелерде Түркияда жашаган жана каттоодон өткөн кыргызстандыктар эртең мененки 8:00дөн тарта кечки сегизге чейин добуш бере алышат.
Үч участокто жалпысынан 3131 шайлоочу бар. Алардын 1081и Анкарада, 1279у Стамбулдагы башкы консулдукта, 771и Анталияда катталган.
Анталия шаарындагы шайлоо тилкеси биринчи жолу ачылып жатат. Өткөн айда президент Садыр Жапаров "Түркиянын Анталия шаарында Башкы консулдугун уюштуруу жөнүндө" жарлыкка кол койгон.
Түркиядагы кыргызстандыктардын дээрлик көпчүлүгү дал ушул Анталия, Измир жана Алания аймактарында жашап, иштегендиктен бул жерлерде шайлоо тилкесин ачуу керектиги бир канча жылдан бери айтылып келген эле.