Сооронбай Жээнбеков: Жумушчу орундары түзүлбөй жатат. Мунун айынан миграция күчөдү. Аймакты өнүктүрөлү дегеним ошондон. Биз кеткендерди кайтара албайбыз, бирок бул жактагы жаштарды кармап калышыбыз керек. Аларды иш менен камсыздоо зарыл. Аймактагы жашоону жакшыртсак, балдарыбыз келе баштайт. Сүт заводдору ар бир жерге курулса дейбиз. Курам дегендерге Орус-Кыргыз фондунан каражат берүүгө даярбыз.
Мен деле тышка барганда мекендештер менен жолугуп атам. Жапонияда бир жигит Бажы маселеси боюнча суроо берди. Сыртта мыкты балдарыбыз жүрөт. Ошолорго жардам берүүгө шарт түзүп беришибиз керек. Буюрса, быйыл дагы август айында жолугабыз. Мекендештер форумун ошону үчүн түзгөнбүз. Кош жарандык боюнча сүйлөшүү болуп жатат азыр. Бир мамлекеттеги жарандарга берсек, анда экинчи мамлекетте жүргөндөргө да берүү керек. Алар Кыргызстанда турак жай, жер сатып алуу маселеси көтөрүшкөн. Эксперттер бул маселенин үстүнөн иштеп атат. Биз азыр аларга кредит же жер бере албайбыз. Бирок иштешине мүмкүнчүлүк түзө алабыз.
Сооронбай Жээнбеков: Бизде эң көп айлык алгандар бул мугалимдер болушу керек. Бул маселенин үстүнөн иштеп жатабыз. Шайлоодо да бул тууралуу убада бергем. Кудай кааласа ишке ашырабыз.
Сооронбай Жээнбеков: - Президент болгондон бери канча айтса да мен бир да сөз айткан жокмун. Себеби мага мамлекеттин, элдин тынчтыгы, биримдиги, бүтүндүгү абийиримен да, тагдырыман да бийик турат. Көңүл бурган жокмун, өзүңөр көрүп жаттыңар. Мамлекетти экиге бөлгөнгө, бийликти басып алганга чакырыктар болуп жатты. Баарына чыдадым, “эми токтоор” деп күттүм. Бирок аягында өзүн да, мени да, мамлекетти да туңгуюкка алып келип салды. Маселе эми мыйзам чегинде чечилет. Ал азыр менин колумда эмес. Ага чейин экөөбүздүн колубузда болчу. Парламент саясий баасын берди, ага кошумча айта албайм. Бул маселе менин да жүрөгүмдү оорутат, ойлонтот, оңой эмес. Мен эми бир топ адамдардын эмес, мамлекеттин, элдин кызыкчылыгын коргоого өттүм. Келечекте мени эмне күтөт, Кудайдын колунда, - деп жооп берди Сооронбай Жээнбеков "Кактус медианын" суроосуна.
Сооронбай Жээнбеков: Топчубек Тургуналиев, Турсунбек Акун, Жыпар Жекшеев 90-жылдары элден суурулуп чыгып, демократия орношуна салым кошкон адамдар. Элге жагабы же жакпайбы оюн айтышты. Ошон үчүн сыйлайм. 2000-жылдары алардын катарына Азимбек Бекназаров кошулган. Ал дагы элге жакса-жакпаса да оюн айтты. Идея үчүн күрөштү. Ага элчилик кызматты мен өзүм сунуштагам. ТИМдин бул жерде күнөөсү жок. "Ушунча жыл оппозицияда жүрдүң, ошол энергияңды элчиликке жумша" дедим. Малайзияга барганда жакшы иштеп берет деп ишенем. Ал кызматты таштап кетип калышы да мүмкүн. Бирок антпейт деп ишенем. Жакшы идеясы болсо биз аны оппозиция же позиция деп бөлбөй ишке тартабыз.